Այսօր՝ նոյեմբերի 1-ին, ԱԺ-ում հրավիրվել է արտահերթ նիստ. «Ելք» խմբակցությունը վարչապետի պաշտոնում առաջադրել է Նիկոլ Փաշինյանի թեկնածությունը:
ԱԺ փոխխոսնակ Էդուարդ Շարմազանովը իր ելույթում հայտնեց իր կարծիքը կառավարության 6 ամսվա աշխատանքի վերաբերյալ և ասաց. «Ես ուզում եմ հարցնել՝ մեր կյանքը լավացե՞լ է, թե՞ վատացել. նկատի չունեմ ՀՀԿ-ի կյանքը, այլ ժողովրդի»:
Նրա խոսքով՝ 2-րդ եռամսյակում 1-ին եռամսյակի համեմատ 3 անգամ պակասել են ներդրումները: «10-15 աշխատատեղ բացում եք՝ «Հայլուրը» մի շաբաթ ցույց է տալիս, այն դեպքում, որ Ալավերդու պղնձաձուլարանը փակման վտանգի տակ է»,- նշեց նա:
«Բա հեղափոխության ժամանակ ձեր ներքնաշորերով կամերաներն էիք փակում՝ բա ո՞նց եղավ: Պարզվում է, որ կարմիր գծերն էլ պետք են, որ մանկապարտեզները նորոգենք»,- ասաց Շարմազանովը:
Անդրադառնալով արտաքին քաղաքականությանը՝ Շարմազանովը հարց բարձրացրեց. «Վիզը ծուռը նա՞ է, որ ՀՀ-ն ՀԱՊԿ-ում գլխավոր քարտուղարի պաշտոն է ունեցել: Ձեր հպարտ վզով քաղաքականությունն էլ տեսանք. Բոլթոնն ասաց՝ դուք ձեր պատմական կաղապարներից հրաժարվեք»:
Նրա խոսքով՝ չկա հին ու նոր Հայաստան. «Հայաստանը մեկն է, որը հաղթեց Բելին և գնալու է դեպի հավերժություն: Եվ Հայկը երբեք չի կարող պարտվել Բելին»:
Մանրամասները՝ տեսանյութում:
