Ադրբեջանական APA լրատվական գործակալության փոխանցմամբ՝ ՄԱԿ-ում ԱՄՆ նախկին ներկայացուցիչ և նախագահական հնարավոր թեկնածու Ջոն Բոլթոնը հայտարարել է, որ ԱՄՆ կառավարությունը պետք է ավելի շատ աջակցի Ադրբեջանին.
«Հաշվի առնելով դեպի Սև ծով Ադրբեջանի նավթագազային պաշարների ելքը, «Բաքու-Թբիլիսի-Ջեյհան» (ԲԹՋ) նավթամուղի կարևորությունը և Ադրբեջանի աշխարհագրական դիրքը՝ ԱՄՆ-ը պետք է ավելի մեծ ուշադրություն հատկացնի Ադրբեջանին, սակայն ակնհայտ է, որ ղարաբաղյան սառեցված հակամարտությունը մի փոքր դժվարացնում է դա։
ԱՄՆ-ը պետք է պատրաստ լինի Ադրբեջանին զգալի օգնություն ցուցաբերելու հարցում, քանի որ Ռուսաստանը ցանկանում է տարածաշրջանում վերականգնել իր ազդեցությունը։ Հետխորհրդային տարածքում ընթանում են մի շարք կարևոր գործընթացներ։ Ինձ թվում է` մենք չպետք է մոռանանք, թե ժամանակին ինչ է ասել Վլադիմիր Պուտինը, երբ նա դեռ նախագահ էր։ Պուտինը Խորհրդային Միության փլուզումն անվանել էր 20-րդ դարի աշխարհաքաղաքական խոշորագույն աղետ։
Ի տարբերություն Պուտինի՝ ես այդ իրադարձությունները համարում եմ 20-րդ դարի լավ վերջաբան, սակայն այդ բոլոր հակամարտությունները և 2008 թվականին Վրաստանի վրա Ռուսաստանի հարձակվելը ցույց են տալիս, որ Ռուսաստանը ձգտում է տարածաշրջանում վերականգնել իր ազդեցությունը։ Դրա համար էլ մենք պետք է մեծացնենք Ադրբեջանի հանդեպ մեր ուշադրությունը»։
