ԼՂՀ նախագահի մամուլի խոսնակ Դավիթ Բաբայանը «Առաջին լրատվականի» հետ զրույցում, գնահատելով երեկ Կազանում կայացած եռակողմ հանդիպումը, նշեց, որ ԼՂ-ն որևէ առաջընթաց Կազանից չէր ակնկալում, ինչն էլ եղավ.
«Առաջընթացի համար պետք է հաշվի առնվեն մի շարք կարևոր պայմաններ և ոչ միայն Կազանում, այլ ընդհանրապես հակամարտության կարգավորման գործընթացում»:
Բաբայանը նշեց, որ այդ պայմաններից առաջինը Ադրբեջանի պահվածքի և քաղաքականության փոփոխությունն է, առանց որի հնարավոր չէ որևէ բանի հասնել. «Երկրորդ՝ պետք է վերականգնել այն ձևաչափը, երբ բանակցություններին մասնակցում էր նաև ԼՂ-ն, քանզի նման բան չի լինում, որ ստորագրվի մի պայմանագիր, որի քննարկման ոչ մի փուլին մենք չենք մասնակցել՝ նման բան լինում է միայն ագրեսոր երկրի նկատմամբ, իսկ մենք այդպիսին չենք»:
Դավիթ Բաբայանը շեշտեց, որ բոլորի համար պետք է հստակ լինի, որ վերադարձ չկա 1988 կամ 1991 թթ.-ի իրավիճակին:
«Եթե այս հարթություններում չկա Ադրբեջանի կողմից իրավիճակի վերանայում, ապա որևէ բան ակնկալել Կազանում, Պետերբուրգում, Վաշինգտոնում, թե Դուբայում անիմաստ է: Լինեն մադրիդյան, թե ինչ-որ այլ սկզբունքներ, ապա դրանք պետք է հաշվի առնեն այս պայմանները»:
Համանախագահների նշած նոր հայեցակարգի մշակման հանգամանքի մասին խոսելով՝ Բաբայանը նշեց, որ այդ նոր հայեցակարգի մշակումը ոչ միայն հնարավոր է, այլ նաև անհրաժեշտ է. «Այդ հայեցակարգը պետք է լինի իրատեսական: Պետք է վերջապես միջազգային հանրությունը թոթափի Ադրբեջանի շանտաժի արդյունքում ձևավորված մթնոլորտը»:
