Անցած տարի տարեվերջին՝ նոյեմբերի 21-ին, Վայոց ձորի մարզի Արենի գյուղի մոտակայքում բեզոարյան այծի ապօրինի որսի դեպք էր գրանցվել, իսկ որսագողերը սովորական գյուղացիներ չէին:
Վաչագան Ղարախանյանից բացի, ով ոստիկանության տեսախցիկի առաջ պատմում էր, թե ինչպես է որսացել բեզոարյան այծը, ինչպես է կրակել, ինչպես է ուսերին դրած տարել որոշակի հատված, այդ որսին մասնակցել էին նաև մարզի նախկին և ներկա պաշտոնյաներ՝ Եղեգնաձորի նախկին քաղաքապետ Սիրեկան Բաբայանը, Վայքի այժմյան փոխքաղաքապետ Վասիլ Ասլանյանը, ով քաղաքապետ Հարություն Սարգսյանի աներձագն է: Բացի նրանցից, որսին մասնակցել էին նաև Վահան Սաղաթելյանը և Արայիկ Մուրադյանը:
Կարմիր գրքում գրանցված կենդանու որսի փաստով նոյեմբերի 26-ին ոստիկանության Վայոց ձորի քննչական բաժնում հարուցվել էր քրեական գործ ՀՀ քրեական օրենսգրքի 294 հոդվածի 1-ին մասի հատկանիշներով (ապօրինի որս, որը պատճառել է խոշոր վնաս):
Երեկ ոստիկանությունից «Առաջին լրատվական»-ին հայտնեցին, որ գործով դեռևս հետաքննություն է ընթանում, և ոչ ոքի մեղադրանք չի առաջադրվել: Ուշագրավ է, սակայն, որ ամբողջ Վայքում խոսում են, որ այս գործն արդեն վաղուց փակված է: Փոխքաղաքապետն ու նախկին քաղաքապետը, ինչպես նաև մյուսները, վաղուց լուծել են իրենց հարցերը՝ յուրաքանչյուրը վճարելով 1,5 միլիոն «տուգանք»:
Նշենք, որ բեզոարյան այծը գրանցված է Կարմիր գրքում, որի որսը քրեորեն պատժելի արարք է համարվում:
