РИА Новости-ի փոխանցմամբ, ՀՀ ԱԳՆ մամլո խոսնակ Տիգրան Բալայանն այսօր հայտարարել է, որ Հայաստանն ու Թուրքիան բանակցություններ չեն վարել ղարաբաղյան հակամարտության կարգավորման վերաբերյալ.
«Հայաստանը Թուրքիայի հետ բանակցություններ չի վարել ղարաբաղյան հակամարտության կարգավորման վերաբերյալ, և բնականաբար խոսք չի գնացել ո՛չ 5, ո՛չ 3 և ո՛չ էլ անգամ 1 շրջանի վերադարձման մասին։
Այդ հղումը ինչ-որ նախարարների մանիպուլյացիան է, աճպարարությունը, որը նման է նաև այն ասածներին, թե իբր Չավուշօղլուն չի աջակցել ԵԽԽՎ-ում Լեռնային Ղարաբաղի հարցով ենթահանձնաժողովի վերակենդանացմանը, ինչի մասին հրապարակայնորեն արտահայտվել են ԵԽԽՎ մի շարք անդամներ և անգամ Ադրբեջանի պատվիրակները»։
Հիշեցնենք, որ ավելի վաղ Թուրքիայի իշխող «Արդարություն և զարգացում» կուսակցությունը (ԱԶԿ) ներկայացնող ԵԽԽՎ նախագահ Մևլութ Չավուշօղլուն հայտարարել էր, թե իբր Հայաստանի ու Թուրքիայի միջև պայմանավորվածություն է ձեռք բերվել հինգ, երեք կամ անգամ մեկ շրջանի վերադարձման վերաբերյալ: