Քաղաքագետ Հրանտ Մելիք-Շահնազարյանն այսօր լրագրողների հետ հանդիպման ժամանակ խոսեց Կազանի եռակողմ հանդիպման արդյունքների մասին: Նա մեջբերեց ՀՀ ԱԳ նախարար Էդվարդ Նալբանդյանի հարցազրույցը, որտեղ վերջինս նշում է այն պատճառները որոնք խոչընդոտել են փաստաթղթի ստորագրմանը: Մելիք-Շահնազարյանն ընդգծեց, որ մինչ հանդիպումը «Եվրանյուզին» տված Ալիևի հարցազրույցը, որտեղ վերջինս նշում է, թե հետագայում բանակցությունները շարունակվելու են այն հարցի շուրջ, թե ինքնավարության ինչ ձևաչափ պետք է ունենա ԼՂ-ն Ադրբեջանի կազմում, արդեն իսկ մեծ ազդանշան էր, որ Ադրբեջանը գալիս է Կազան բանակցային գործընթացը տապալելու նպատակով:
«Այժմ մեզ համար առաջնային են լինելու միջազգային կառույցների և ԵԱՀԿ Մինսկի խմբի հետագա քայլերը, որոնք մինչ հանդիպումն արդեն ասել են, որ եթե այս անգամ էլ հաջողության չհասնեն, ապա ստիպված կլինեն կտրուկ փոփոխություններ մտցնել առաջարկվող փաստաթղթում, կամ էլ միգուցե ընդհանրապես հրաժարվեն Մադրիդյան սկզբունքներից»,- պարզաբանեց Մելիք-Շահնազարյանը՝ հավելելով, որ այս պահին շատ կարևոր է ընդգծել, որ խափանող կողմը հանդիսացել է հենց Ադրբեջանը. «Կարծում եմ, որ բանակցություններից այս կերպ հրաժարվելը ձգտում է այն ինչ-որ մեկ այլ բանով փոխարինելու»:
Հրանտ Մելիք-Շահնազարյանը նշեց, որ սա, խոշոր հաշվով, ձախողում էր Ռուսաստանի համար, ինչպես նաև մյուս միջնորդների՝ ԱՄՆ-ի և Ֆրանսիայի համար, քանզի մինչ հանդիպումը հնչում էին լավատեսական հայտարարություններ և համանախագահող երկրները հեռախոսազրույցներ են ունեցել կողմերի հետ:
