Հոկտեմբերի 21-ին կայանալիք ՏԻՄ ընտրություններում ԲՀԿ-ն ընդամենը 2 համայնքում է թեկնածու առաջադրել՝ Արագածոտնում և Լոռիում: Այս մասին «Առաջին լրատվական.-ի հետ զրույցում նշեց «Ծառուկյան» խմբակցության պատգամավոր Վարդևան Գրիգորյանը: Նրա խոսքով, ընտրություններին մասնակցելը չպետք է ինքնանպատակ լինի. «Քանի որ այսօր դրված է դեկտեմբերին արտահերթ խորհրդարանական ընտրություններ անցկացնելու հարցը, ԲՀԿ-ն իր ողջ ներուժը կենտրոնացնելու է ԱԺ ընտրությունների վրա: Սա է հիմնական պատճառը, որ ԲՀԿ-ն քիչ թեկնածուներ ունի ՏԻՄ ընտրություններում»,-ասաց նա:
Դիտարկմանը, որ Երևանի ավագանու ընտրություններում ԲՀԿ-ն ընդամենը 7 տոկոս ձայն ստացավ, կարո՞ղ է նույն պատկերը կրկնվել ԱԺ ընտրություններում, Վարդևան Գրիգորյանը պատասխանեց. «Չեմ կարող այս երկու ընտրությունները համեմատել: ԲՀԿ-ն իր ստեղծման օրվանից կարողացել է ակտիվ դերակատարում ունենալ երկրի քաղաքական կյանքում, միշտ եղել է երկրորդ քաղաքական ուժը: Իհարկե, Երևանի ընտրություններում մեր սպասած տոկոսները չկարողացանք ունենալ, բայց մենք ակտիվ կնախապատրաստվենք ԱԺ ընտրություններին»:
Այս պահի դրությամբ պատգամավորի մանդատ վերցնելու հարցում ինձ համար կարևորը այն էր, որ միանամ արտահերթ խորհրդարանական ընտրություններ կազմակերպելու ստորագրահավաքին։ Այս մասին «Առաջին լրատվական»-ի հետ զրույցում նշեց ՀՀԿ ցուցակով օրերս պատգամավոր դարձած Մարտուն Գրիգորյանը։
Հարցին, թե առաջիկա խորհրդարանական արտահերթ ընտրություններին մասնակցելու է, թե ոչ, Գրիգորյանը պատասխանեց, որ այս պահի դրությամբ դեռ որոշում չունի. «Առաջիկայում իմ թիմակիցների հետ խորհրդակցելուց հետո, ևս մեկ անգամ ստեղծված քաղաքական իրավիճակը հասկանալուց հետո հստակ որոշում կունենամ և լրատվամիջոցներին կտեղեկացնեմ»։
Նա ընդգծեց, որ մեծ թիմ ունի Գյումրիում և ընդհանրապես Շիրակի մարզում. «Մանդատը վերցնելու որոշումն էլ հենց այնպես չի կայացվել։ Ես հանդիպումներ եմ ունեցել իմ թիմակիցների հետ, ընտրողների հետ, նաև հարազատ մարդկանց հետ և դրա արդյունքում է որոշումը կայացվել։ Մնացած որոշումները ևս, թե որ ընտրություններին մասնակցենք, որին չմասնակցենք, հիմնականում թիմային որոշում է եղել»,-ասաց Մարտուն Գրիգորյանը, ով նախորդ գումարման ԱԺ-ում պատգամավոր էր ընտրվել ԲՀԿ-ի ցուցակով։
