Հյուսիսային պողոտայի նախկին բնակիչներն այսօր նորից հավաքվել էին կառավարության մոտ՝ պահանջելով տասը տարի առաջ կորցրած բնակարանների գումարները: Բուզանդի 9 հասցեի նախկին բնակիչ Քնարիկ Առաքելյանը «Առաջին լրատվական»-ի հետ զրույցում նշեց. «Մեր շենքը պատմական հուշարձան էր, քանդեցին, շպրտեցին դուրս և կոպեկներ վճարեցին: Ունեցել եմ 120 քառ. մետր տարածք, ստացել եմ 46.500 դոլար»:
Նա նշեց, որ տեղ չի մնացել, որ չդիմեն: Է՛լ Ռոբերտ Քոչարյանին, է՛լ Սերժ Սարգսյանին, բոլորը ուղարկում են ԾԻԳ:
Նախկին բնակիչները նշեցին, որ իրենց տները կորցրել են հենց Ռոբերտ Քոչարյանի նախագահության տարիներին, և հիմա Ռոբերտ Քոչարյանն իրավունք չունի խոսելու, երբ ամբողջ Կենտրոնի ժողովրդի մուխը հանեց, բոլորի թևից բռնեց, հանեց դուրս, էլիտար շենքեր կառուցեց, որտեղ հիմա ոչ ոք չի ապրում:
«Նա ինչպե՞ս է երևում ժողովրդի աչքին հոկտեմբերի 27-ից հետո. դրանց երեսը շան երես է: Նա ոչ մի շանս չունի: Ժողովուրդը իրեն ո՛չ կընտրի, ոչ էլ: Եվ եթե վարչապետ է ուզում դառնալ, ամբողջ ժողովուրդը ոտքի կկանգնի: Ժողովուրդը իրենց չի ընտրում, դրա համար էլ իրենք վրեժ են լուծում ժողովրդից»,- ասաց Քնարիկ Առաքելյանը:
Գոհար Ասատրյանն էլ հավելեց, որ արդեն տասը տարի է՝ 2004 թվից, հանել են, գցել դուրս: «Մեզ հանեցին. մեր կողքի հարևանին ջարդեցին, ծեծեցին, մենք էլ թողեցինք, դուրս եկանք: Մտածեցինք՝ մեզ էլ կխփեն: Հետո Զախարյանը հայտարարեց, որ Հյուսիսային պողոտայի բնակիչներին քառակուսի մետրի համար տվել է հազար դոլար, բայց տվեց 210-240:
Սա կլանների երկիր է, ժողովրդավարական երկիր չէ»,-ասաց նա:
Լալայանց 5 հասցեի բնակչուհի Ասատրյան Ջուլիետան նշեց, որ Սերժ Սարգսյանը երբ նախագահ ընտրվեց, իրենց բնակիչներից երկու հոգու հետ հանդիպեց, ասաց՝ մայիսի 15-ից հետո հարցը կլուծենք, ասաց՝ մի քիչ կոնստրուկտիվ եղեք: Սակայն ոչ մի օգուտ: Ոչինչ չարեց: Ամո՛թ է, ամո՛թ»,- ասաց նա:
Նրանք պահանջում են կա՛մ լիարժեք բնակարանները՝ նույն տեղում, կա՛մ համարժեք գումար:
