Հայաստանի երկրորդ նախագահ Ռոբերտ Քոչարյանն օրերս հարցազրույց է տվել հեղինակավոր Bloomberg մեդիաընկերությանը, որտեղ անդրադարձ է կատարել թե՛ Մարտի 1-ի գործով իրեն որպես մեղադրյալ ներգրավվելուն ու իր հետագա ճակատագրին և թե՛ իր ապագա քաղաքական պլաններին։
Թեպետ ամիսներ առաջ Քոչարյանը հայտարարեց, որ արդեն իսկ վերադարձել է քաղաքականություն, այժմ նշում է, որ առաջիկա արտահերթ ընտրություններին մասնակցելու որևէ մտադրություն չունի և չի հավակնում վարչապետի պաշտոնին։ Քոչարյանն ընդգծել է, որ դեկտեմբերին ձևավորվելիք խորհրդարանը կլինի միակուսակցական, դրա կլինեն Փաշինյանի անձնական տակտիկական հաղթանակը, բայց պարտություն մեր պետականության համար։
Քաղաքական վերլուծաբան Արմեն Բաղդասարյանի կարծիքով՝ Քոչարյանի չմասնակցությունը պրագմատիկ պատճառ ունի. «Չի գտել ֆորմատ, չկա քաղաքական ուժ, որով նա կարող էր մասնակցել ընտրություններին»։
Ըստ մեր զրուցակցի՝ նա ցանկացած դեպքում շեմը հաղթահարելու շանս չէր ունենա. «Երբ հայտարարում էր, որ մասնակցելու է, այլ իրավիճակ էր, հետագայում պարզ դարձավ, որ այլ վիճակ է, այսինքն` վարչապետը շարունակում է վայելել հասարակության մեծամասնության աջակցությունը»։
Քոչարյանի դիտարկումները միակուսակցական խորհրդարան ունենալու հետ կապված տեղին չեն։ «Անկախ հավաքած տոկոսներից՝ մեկ երրորդը պետք է լինի ընդդիմություն, մեկ այլ տարբերակով էլ՝ չորս քաղաքական ուժ պետք է ներկայացված լինի։ Կարծում եմ ՝ օրենսդրական այդ փոփոխությունը կհասցնեն անել մինչև ընտրությունները»,- նկատեց Բաղդասարյանը։
Ըստ մեր զրուցակցի՝ Քոչարյանի մասնակցել կամ չմասնակցելը որևէ էական նշանակություն չունի. «Բացարձակ ոչինչ կախված չէ, որևէ մեկը, որպես քաղաքական գործիչ, իրեն չի ընկալու։ Նա երբևէ չի ունեցել քաղաքական ուժ, միշտ ասել է՝ ժողովուրդն է իր կուսակցությունը, իսկ հիմա ակնհայտ է ժողովրդի վերաբերմունքն իր նկատմամբ։ Իսկ եթե փորձեր հավակնություններ դրսևորել, ապա, ըստ իս՝ ոչ թե կուսակցություն կստեղծեր,այլ գոյություն ունեցող կուսակցությունները պետք է իր անձի շուրջը համախմբվեին, բայց իր այդ պլանը ձախողվեց»։
Քաղաքագետ Գագիկ Համբարյանի կարծիքով՝ զարմանալի է, որ Քոչարյանը, իմանալով իր վարկանիշը, ընդհանրապես հանդգնություն է ունեցել մասնակցել ընտրություններին. «Ընդհանրապես ՔՊ-ի շռնդալից արդյունքը պայմանավորված էր նաև ՀՀԿ-ականների ու Քոչարյանի գերակտիվությամբ, այսինքն` իրենք իրենց ակտիվությամբ ամեն ինչ արեցին, որ ՔՊ-ի ձայները կտրուկ ավելանան»։
Նրա խոսքերով՝ հասարակությունը Մարտի մեկից հետո չի ուզում գործ ունենալ Քոչարյան գործչի հետ. «Զարմանալի է, որ նոր է հասկացել։ Նա ընդհանրապես չպետք է հրաժարվեր իր գործելաոճից։ Նախկինում պարոն Քոչարյանը գործակցում էր բոլորի հետ, բայց բացահայտ չի հայտարարել ու ասել, որ ինքն է կանգնած այդ ուժերի հետևում կամ այդ ուժերի միջոցով խորհրդարան էր տանում իրեն լոյալ գործիչներին։ Եթե նա ուզում էր իր ազդեցությունն ունենալ ներքաղաքական գործընթացների վրա, նույն կերպ պետք է շարունակեր։ Քոչարյանը հասկանում է՝ եթե փորձի ստեղծել ուժ ու ներթափանցել ԱԺ՝ չի ստացվելու։
Նա օգտվելու է իր վաղուց կիրառած տակտիկայից, այն է` հովանավորել է ինչ-որ գործիչների ու ֆինանսապես օգնել է այդ կուսակցություններին, ինչպես նախընտրական շրջանում, այնպես էլ քարոզարշավի ժամանակ»։
Նախկինում Քոչարյանի հնչեցրած հայտարարությունների մասով, մեր զրուցակիցը նկատեց՝ գուցե այդ պահին ձեռնտու էր նման բան ասել. «Քանի որ Փաշինյանը ուզում էր Քոչարյանին տեսնել ճաղերի հետևում՝ նրա միակ ինդուլգենցիան հայտարարելն էր, որ իրեն հալածում են նոր իշխանությունները, իսկ հիմա երևի «դաբրոներ» է ստացել ու փորձում է ավելի հանգիստ գործել»։
Ինչ վերաբերում է միակուսակցական համակարգ ունենալու Քոչարյանի դիտարկումներին, մեր զրուցակիցն ասաց. «Խորհրդարանը գոնե միակուսակցական չի լինի՝ հաշվի առնելով, որ ըստ Սահմանադրության՝ 30 տոկոսը պետք է ընդդիմադիր կուսակցություններ լինեն, իսկ ինչ վերաբերում է պետականության պարտությունը, ապա ասեմ, որ հարցին երկուստեք պետք է նայել․ ստացած ձայները ոչ միայն հաղթանակ, այլ նորանոր պարտականությունների առաջ են կանգնեցնում գործող իշխանություններին»։
