Երեքշաբթի լույս չորեքշաբթի գիշերը Հունաստանի ներքին գործերի նախարարության գրասենյակի մոտ աշխատել է ինքնաշեն պայթուցիկ սարք՝ հաղորդում է RIA Novosti-ն:
Նախարարի կուսակցական գրասենյակը գտնվում է Աթենքի կենտրոնում: Գազի բալոնի հիմքով պատրաստված ռումբը դրված է եղել չորրորդ հարկում՝ տարածքի մուտքի մոտ: Պայթյունից հետո հրդեհ է բռնկվել:
Գրասենյակն այդ ժամին փակ է եղել, և տուժածներ չկան: Պայթյունի պատասխանատվությունը ոչ մեկը դեռևս չի ստանձնել: Նման պայթուցիկ սարքեր հաճախ օգտագործում են անարխիստական խմբավորումները:
«Որոշ ուժեր փորձում են ստեղծել վախի մթնոլորտ: Դա նրանց չի հաջողվի: Ժողովրդավարությանը չես վախեցնի»,- հայտարարել է նախարարը:
