«Առհասարակ, թյուր կարծիք կա, թե հեղափոխությունները սովորաբար հանգեցնում են տնտեսության անկման, բայց օրինակ հայաստանյան դեպքերը ցույց տվեցին, որ դա այդպես չէ։ Այն ցուցանիշները, որոնք մատնանշել է վարչապետը՝ կարևոր են մի քանի տեսանկյունից․ նախ՝ այս կամ այն հեղափոխության ազդեցությունը շատ հաճախ բնութագրվում է հանցագործությունների աճով, որը ՀՀ-ում ամենևին այդպես չէ, երկրորդ՝ տնտեսական ակտիվության աճով, որն այս ամիսներին բնորոշ է Հայաստանին և հաջորդը՝ փողի ավելացման քանակությամբ, որն էլ իր հերթին ամենակարևոր ցուցանիշներից մեկն է․ երբ փողի նկատմամբ ֆիզիկական և իրավաբանական անձանց վերաբերմունքը փոխվում է, հետաքրքրությունը մեծանում է, ապա դա խոսում է երկրի կայունության և այն սպասումների մասին, որոնք ունեն տնտեսվարող սուբյեկտները»,- «Առաջին լրատվական»-ի հետ զրույցում ընդգծեց տնտեսագիտության դոկտոր, պրոֆեսոր Աշոտ Մարկոսյանը՝ անդրադառնալով վարչապետի գրառմանը։
Հիշեցնենք, որ ՀՀ վարչապետ Նիկոլ Փաշինյանը օրերս իր ֆեյսբուքյան էջում գրել էր, որ հեղափոխությունից ի վեր, այսինքն՝ մայիսից մինչ օրս, բանկային համակարգի ակտիվներն աճել են 10.5 տոկոսով, վարկերը աճել են 7 տոկոսով, ֆիզիկական անձանց վարկերն աճել են 10.4 տոկոսով, իրավաբանական անձանց վարկերն աճել են 4.3 տոկոսով, իսկ ավանդներն աճել են 9.2 տոկոսով:
Այս համատեքստում Աշոտ Մարկոսյանը հավելեց նաև․
«Այս տարի՝ ապրիլից առաջ, Հայաստանի առևտրային բանկերից նկատվեց ավանդների արտահոսք՝ շուրջ 108 միլիարդ դրամ, սակայն հունիսի վերջերի դրությամբ՝ ավանդների թիվը զգալիորեն աճեց՝ հասնելով 2․7 տրիլիոն դրամ, ինչը Հայաստանի համար ռեկորդային ցուցանիշ է․ ավանդների աճի գործում մեծ դերակատարում ունեցան հատկապես ոչ ռեզիդենտները, այսինքն՝ ոչ Հայաստանի իրավաբանական և ֆիզիկական անձինք, ներդրողները, որը մեր երկրի նկատմամբ վստահության ավելացման կարևոր ցուցանիշներից մեկն է։ Ավանդների աճն իր հերթին բերում է թե ֆիզիկական, թե իրավաբանական անձանց ռեսուրսների ավելացմանը և նախևառաջ բանկային ակտիվների ավելացմանը, իսկ բանկային ակտիվն այն մեծությունն է, որը բանկը վարկերի տեսքով տրամադրում է ֆիզիկական և իրավաբանական անձանց, այսինքն՝ այս շրջափուլն անընդհատ կրկնվում է և ինչքան ավանդների քանակը մեծ լինի, այնքան լավ»։
Մանրամասները՝ տեսանյութում։
