Ամերիկացիների մոտ 60%-ը վերջին նորություններն իմանում են սոցիալական ցանցերի ընկերների միջոցով: Այս մասին ասել է Արևելյան Եվրոպայում Facebook սոցցանցի ներկայացուցիչ Անգելա Ցեն` ելույթ ունենալով Մոսկվայում RIA-Novosti գործակալության 70-ամյակին նվիրված համաժողովի ժամանակ:
«Ես ինքս եմ փորձել օգտագործել իմ անձնական լրահոսը Facebook-ում՝ որպես տեղեկություններ ստանալու միակ աղբյուր: Եվ հասկացել եմ, որ բաց չեմ թողնում կարևոր լուրերը»,- ասել է Ցեն: Վերջին 15 տարիներին ինտերնետի զարգացման հիմնական միտումն էր տեղեկատվության անընդհատ կուտակումը: Այս առումով սոցիալական բաղադրիչը կարևոր դեր է խաղում:
Նա նաև հավելել է, թե նորությունները, որոնք հրապարակում են ընկերները սոցցանցերում, ավելի հետաքրքիր են սպառողներին. «Դրանք արդեն հավանության են արժանացել մեր ընկերների կողմից, եթե նրանք կատարել են այդ հրապարակումը` հղում տալով դրանց: Բացի այդ, մենք կարող ենք միանգամից իմանալ, թե ինչ են մտածում ընկերներն այն նորությունների մասին, որի վրա հղում է արված»,- ասել է Facebook-ի ներկայացուցիչը:
Նա եզրակացնում է, որ սոցցանցերը դարձել են յուրօրինակ մաղ, որը թույլ է տալիս ստանալ ամենակարևոր և անհրաժեշտ տեղեկությունները, որոնք ամեն օր հրապարակվում են սոցցանցերում: «Օրինակ՝ ամերիկացիների 90%-ը լսում են այն երաժշտությունը կամ դիտում են այն ֆիլմը, որոնք ավելի վաղ հավանության են արժանացել իրենց ընկերների կողմից»,- ասել է Ցեն:
