«Ներդրողները, եթե տեսնում են, որ տվյալ երկրում կան իրենց համար քաղաքական, տնտեսական, ռազմական կամ այլ բնույթի ռիսկեր ու խոչընդոտներ, ապա իրենք երբեք խոշոր ներդրումներ չեն անի, որովհետև ոչ մի խոշոր ներդրող իրեն վտանգի չի ենթարկի՝ որքան էլ իր բիզնեսի եկամտաբերությունը լինի բարձր, իր գումարների վերադարձելիությունը լինի արագ, այսինքն՝ մենք պետք է հասկանանք, որ լուրջ ներդրումները 4-5 և անգամ մինչև 10 տարի կտրվածքով պետք է դիտարկել։ Նման պայմաններում պետք է դիտարկենք նաև, թե Հայաստանը՝ լավ կամ վատ ի՞նչ անակնկալներ կարող է մատուցել ներդրողներին, որն էլ նրանց համար կարող է ազդակ լինել՝ այստեղ ներդրումներ անելու կամ չանելու համար»,- «Առաջին լրատվական»-ի հետ զրույցում նշեց Գործատուների հանրապետական միության նախագահ Գագիկ Մակարյանը՝ խոսելով խորհրդարանական արտահերթ ընտրությունների անհրաժեշտության և տնտեսության վրա դրա ազդեցության ու ներդրումներ ներգրավելու փոխկապակցվածության մասին։
Այս համատեքստում Գագիկ Մակարյանը հավելեց նաև, որ նման դեպքում Հայաստանը ներդրողների համար պետք է ապահովի տվյալ կառավարության շարունակականությունը, տվյալ կառավարության քաղաքականության հաստատունությունը այդ ժամանակահատվածի համար։ Ասվածն ավելի կոնկրետ պատկերացնելու համար բանախոսը օրինակ բերեց նախկին կառավարությանը։
«Կարեն Կարապետյանի կառավարությունը հնգամյա ծրագիր ներկայացրեց, այդ ծրագրում առաջնահերթություններ սահմանեց, բավականին աշխատանքներ կատարեց այդ ուղղությամբ, բայց, երբ Հայաստանում ներքաղաքական վիճակը սրվեց, փոխվեց վարչապետն ու կառավարության կազմը, ապա նոր կառավարությունը հին կառավարության 5 տարվա ծրագիրը չհիշեց ու անգամ չցանկացավ էլ այդ ծրագիրը շարունակել՝ բերելով իր գործունեության ծրագիրն ու սկսեց դրանով աշխատել , իր պատկերացմամբ՝ նոր Հայաստանի ռազմավարությունը կառուցել, այսինքն՝ ընդամենը այդ փոփոխությունների արդյունքում մենք էական տարբերություն տեսանք, որին հեռվից հետևում են նաև ներդրողները, հետևաբար՝ չենք կարող ասել, որ ներդրողների համար ներքաղաքական վիճակը կամ կառավարության փոփոխությունը կամ ընտրությունները կարևոր չեն»,-ընդգծեց Մակարյանը։
Մանրամասները՝ տեսանյութում։
