ՀՀ արդարադատության նախարարության ՔԿՀ-ներում և մարմիններում հասարակական վերահսկողություն իրականացնող դիտորդական խմբի ղեկավար Ռոբերտ Ռևազյանը հարցում է ուղարկել արդարադատության նախարարին՝ տեղեկանալու, թե երբ է գործարկվելու «Արմավիր» ՔԿՀ-ն: Այս մասին նա ասաց «Առաջին լրատվական»-ի հետ զրույցում:
«Հարցումն ուղարկել ենք տոներից առաջ՝ դեկտեմբերի վերջին օրերին: Խնդրել ենք պարզաբանել՝ նոր կառուցվող ՔԿՀ-ն երբ և ամբողջությա՞մբ է արդյոք գործարկվելու, թե՞ առանձին մասնաշենքերով, քանի՞ դատապարտյալի համար է նախատեսված լինելու և այլն»,- ասաց Ռոբերտ Ռևազյանը՝ հավելելով, որ հարցման պատասխանին սպասում են մոտ օրերս:
Դիտորդական խմբի ղեկավարը նաև տեղեկացրեց, որ խմբի նոր նախագահի ընտրությունները տեղի կունենան հունվարի վերջերին:
Հիշեցնենք, որ 2013-ին տված հարցազրույցներից մեկում արդարադատության նախարար Հրայր Թովմասյանը նշել էր, որ «Արմավիր» քրեակատարողական հիմնարկի մի մասը շահագործման է հանձնվել: Արդեն իսկ պատրաստ են վարչական հատվածը, խոհանոցը, լվացքատունը, տեսակցությունների հատվածը, բուժմասը և պատժախցերը:
