«Առաջին լրատվական»-ի զրուցակիցն է գործարար Սիլվա Համբարձումյանը
– Տիկին Համբարձումյան, երեկ պարզ դարձավ, որ Սուրեն Խաչատյանն ընտանիքով տեղափոխվում է Եվրոպա: Ձեր 102 միլիոն դրամը ինչպե՞ս եք ստանալու, արդյոք որևէ տեղաշարժ կա՞:
– Նա հանքն ամբողջ սարքավորումներով վաճառել է Մաքսիմ Հակոբյանին, բնականաբար այդ պարտքը փոխանցվում է Մաքսիմ Հակոբյանին, իսկ Մաքսիմ Հակոբյանը աղքատ չէ, հուսով եմ՝ կտա:
– Մաքսիմ Հակոբյանը որևէ բան ասե՞լ է պարտքը փոխանցելու համար:
– Դեռ ոչ, բայց ես պատրաստվում եմ մամուլի ասուլիս հրավիրել այս ամսվա վերջին:
– Տիկին Համբարձումյան, հնարավո՞ր է՝ Սուրեն Խաչատրյանի բիզնեսները որոշեք շարունակել, Դուք գնեք:
– Ոչ, նման մարդուց պետք է կիլոմետրերով հեռու լինել, նման մարդու հետ շփվելը ինձ համար հակահիգիենիկ է:
– Իսկ ի՞նչ փուլում է Լիճքվազ-Թեյի հանքի պատերազմը: Գիտեմ, որ դիմել եք ՄԻԵԴ:
– Ընթացքի փուլում է, նիստը շուտով կնշանակվի:
– Ի՞նչ եք կարծում՝ Սուրեն Խաչատրյան մարզպետի լիազորությունները դադարեցվելուց հետո Սյունիքի մարզում փոփոխություն կա՞:
– Այո, Սյունիքը ուրախ և երջանիկ ապրում է, և ասում են, որ ինչ-որ առումով նաև ես եղա պատճառ, որ նա գահընկեց եղավ: Ամենամեծ պատիժն այն է, որ նա գնում է երկրից: Ինքը տեսնում է մարդկանց վերաբերմունքը իր նկատմամբ, և սա ամենամեծ պատիժն է: Իմ կարծիքով՝ իշխանությունը այսպես պատժեց նրան:
– Այս պահին ի՞նչ բիզնեսներ ունեք Հայաստանում, հնարավո՞ր է նոր ներդրումներ անեք:
– Մի քանի ամիս հետո կտեսնեք, թե ինչ հսկա երկու գործարաններ կբացվեն: Ձմեռը կավարտվի, և մենք արագ-արագ կավարտենք, արդեն վերջացրինք վճարումները, կսկսի գործել ոսկու հարստացման գործարանը, «Կալաչ»-ին էլ շատ քիչ բան է մնում՝ մոտ մեկ ամսվա աշխատանք, փետրվար-մարտ ամիսներին կավարտենք և կսկսենք: Բայց նոր բիզնես չեմ սկսում: Թեև արդեն ասել եմ, որ կողմնակից եմ Մաքսային միությանը Հայաստանի անդամակցության պատրաստակամությանը, բայց դեմ եմ կուտակային կենսաթոշակի հինգ տոկոսին:
– Իսկ ինչպե՞ս եք հիմնավորում ՄՄ-ին Ձեր կողմ լինելը, երբ բոլորը խոսում են ԵՄ Ասոցացման համաձայնագրի դեպքում տնտեսության ազատականացման մասին:
– Թե՛ ԵՄ Ասոցացման պայմանագրի, թե՛ ՄՄ-ին միանալու դեպքում Հայաստանում ինչպես սկսվել, այդպես էլ շարունակվելու էր, բայց ՄՄ-ն մեզ առավել մեծ հնարավորություններ կընձեռի, քանի որ սա մեր հիմնական ճանապարհը, գործընկերն է եղել բիզնեսի աշխարհում, և ամենալավ շուկան է եղել Ռուսաստանը: Եվրոպայի համար մենք լավագույն ապրանքներ չունենք վաճառելու, Եվրոպայի համար միայն հանքաքարեր կարող ենք վաճառել, ուրիշ ոչինչ: Այնպես որ՝ և՛ տնտեսական, և՛ ռազմավարական առումով ՄՄ-ն ճիշտ է:
– Վերջին ընտրություններից առաջ թեև լուրեր շրջանառվեցին, որ կմտնեք ընտրապայքարի փուլ, բայց չմտաք: Այնուամենայնիվ, հնարավո՞ր է քաղաքականություն Ձեր մուտքը:
– Անպայման զբաղվելու եմ քաղաքականությամբ:
– Կարծում եք՝ կին քաղաքական գործչի տեսա՞կն է պակասում:
– Կարծում եմ՝ այո: Կինը պետք է մտնի քաղաքականություն: Երբ մտնի, այդ ժամանակ արդեն կզգաք տարբերությունը:
– Կան կին պատգամավորներ՝ Հերմինե Նաղդալյան, Կարինե Աճեմյան և այլք:
– Դուք նրանց անցյալը նայեք, նայեք և կհասկանաք, որ մենք կին քաղաքական գործիչ չունենք:
– Իսկ Դուք նախագահակա՞ն, թե՞ խորհրդարանական ընտրություններին մասնակցության հայտ կներկայացնեք:
– Շուտով կհայտարարեմ, թե ինչին կմասնակցեմ:
– Հնարավո՞ր է՝ որևէ կուսակցության միանաք:
– Ոչ, քանի որ կուսակցություններն արդեն իրենց դարն ապրել են, և պետք է նորը գա, որ մարդիկ նորի շունչը զգան: Յուրաքանչյուր քաղաքացու կարող եք հարցնել՝ ունե՞ն արդյոք վստահություն որևէ կուսակցության նկատմամբ, թե ոչ: Պատասխանն ակնհայտ կլինի:
– 2014-ին հնարավո՞ր է Հայաստանում լուրջ փոփոխություններ լինեն:
– Պետք է բոլորս փորձենք, բոլորս միավորվենք և կատարենք այդ փոփոխությունը: Եթե միահամուռ պայքար լինի, իհարկե՝ կհաղթենք, եթե ոչ, ապա նույնությամբ ամեն բան կընթանա, և մենք փոփոխության չենք կարող հասնել:
– Մտավախություն չունե՞ք, որ այս ամենը կվնասի Ձեր բիզնեսին:
– Եթե պետք է վնասեն, թող վնասեն, միևնույն է՝ ես այստեղի բիզնեսով չեմ ապրում, իմ բիզնեսը դրսում է:
– Տիկին Համբարձումյան, 2014-ին հնարավո՞ր է պարբերաբար Ձեզ տեսնենք տարբեր նախաձեռնություններում:
– Ես կմասնակցեմ այն նախաձեռնություններին, որտեղ կտեսնեմ, որ պետությունը սխալ է, մենք՝ ճիշտ:
