Ալիևին չի կարելի հավատալ, Ալիևը չի կատարի ոչ մի պայմանավորվածություն։ Աստված տա, թող լինի, բայց ես չեմ հավատում։ Անդրադառնալով սահմանին տիրող իրավիճակին` «Առաջին լրատվական»-ի հետ զրույցում նշեց Արցախի հերոս, գեներալ-մայոր Արկադի Տեր-Թադևոսյանը (Կոմանդոս). «Մեր հրամանատարները, բանակի ղեկավարությունը ավելի ուժեղացրել են այն գործողությունները, որոնք պաշտպանում են մեր զինվորներին առաջին գծում։ Դա է գլխավորը։ Իրենց դիպուկահարները զօր ու գիշեր ման են գալիս, և ոչ մի դեպքում պետք չի հավատալ Ալիևին»։
Ինչ վերաբերում է Հայաստանի ու Ադրբեջանի ԱԳ նախարարների հանդիպմանը, Արկադի Տեր-Թադևսյանը նկատեց, որ բոլոր դեպքերում Մնացականյան-Մամեդյարով հանդիպումները դրական են, դրական կլինեն նաև Փաշինյան-Ալիև հանդիպումները. «Բայց ադրբեջանցիների գործողություններն ու հանդիպումներից հետո ասածն իրար չի համապատասխանում»։
Նա կարծիք հայտնեց, որ պատերազմը քիչ հավանական է, որովհետև իրականում պատերազմը երկու պետություններ չեն անում. «Մի խումբ պետություններ են անում։ Դուք տեսաք, որ Ռուսաստան-Թուրքիա լարվածությունը եղավ, և Արցախում քառօրյա պատերազմը սկսելու հարցում նրանց մատն է խառը։ Հիմա էլ Ռուսաստանը իր դիրքորոշումը չի փոխի, բայց ավելի շատ Ադրբեջանի կողմը կլինի, քան մեր կողմը։ Իրենց ձեռնտու չի այն քաղաքականությունը, որ մենք վարում ենք»,-ասաց Կոմանդոսը՝ հավելելով, որ Հայաստանում տեղի ունեցած փոփոխությունը մի քանի տարի հետո հասնելու է նաև Ռուսաստան և այնտեղ էլ ժողովուրդն ազատություն կստանա։ «Այդ շարժումն այնտեղ սկսվել է»,-ասաց Արկադի Տեր-Թադևոսյանը։
Նա անդրադարձավ նաև Արցախը բանակցային սեղան վերադարձնելու Նիկոլ Փաշինյանի ջանքերին՝ նշելով. «Դա հենց սկզբից պետք է լիներ։ Հակամարտության սկզբում Արցախը իսկապես բանակցություններին մասնակցում էր, այդ բոլոր փաստաթղթերը կան, բայց մեր ղեկավարությունը վերացրեց դա, իր վրա վերցրեց ամեն ինչ, որ Հայաստանն ու Ադրբեջանը պետք է բնակցեն։ Մենք իրավունք չունեինք այդ քայլերն անելու։ Պետք է իրականում Արցախն ու Ադրբեջանը բանակցեին»։
