Սիրիայի Իդլիբ նահանգում ռազմական գործողություններ տեղի չեն ունենա գոնե կարճաժամկետ հեռանկարում: Համապատասխան պայմանավորվածություն ձեռք են բերել Ռուսաստանի և Թուրքիայի նախագահները սեպտեմբերի 17-ին Սոչիում կայացած հանդիպմանը: Մինչդեռ օրեր առաջ Թեհրանում Հասան Ռոհանին, Վլադիմիր Պուտինը և Ռեջեփ Թայիփ Էրդողանը Իդլիբի խնդրի լուծման միակ ուղին համարում էին լայնածավալ ռազմական գործողությունները: Ըստ էության եռակողմ ձևաչափում կողմերը չկարողացան համաձայնության գալ, քանի որ նրանց շահերը այդ հարցում չհամընկան: Արդյունքում Իդլիբում ապառազմականացված գոտի ստեղծելու վերաբերյալ հուշագիրը ստորագրվեց առանց Իրանի: Թեմայի շուրջ «Առաջին լրատվական»-ը զրուցել է իրանագետ Ահարոն Վարդանյանի հետ:
«Առաջին հայացքից կամ ընդհանրապես տպավորություն է ստեղծվում, որ իրանական շահը հաշվի չառնվեց… Թեհրանի գագաթնաժողովից հետո Թուրքիան և Ռուսաստանը սկսեցին երկկողմ, սեփական խաղը: Տպավորություն է, որ Իրանին փորձում են լուսանցքային դերում թողնել կամ դուրս մղել այս հարցերից: Բայց պետք է հաշվի առնել, որ Իրանը սիրիական խնդրում, սիրիական ճգնաժամում երևի թե ամենաշատ ներկայություն ունեցող երկիրն է, և շատ բարդ կլինի Իրանին լուսանցքային դերում թողնել: Այս ամենը գիտակցում են նաև Ռուսաստանը և Թուրքիան»,- ասաց Վարդանյանը:
Մեր զրուցակցի գնահատմամբ՝ Իրանը գոնե հետագայում եթե ոչ, այսպես ասած, ագրեսիվ ձևով, ապա հետզհետե կփորձի հակազդել Ռուսաստան-Թուրքիա տանդեմին: «Իրանական դիվանագիտությունը պահի ազդեցության տակ հապճեպ որոշումներ չի կայացնում: Միշտ ականատես ենք եղել, երբ տարածաշրջանում դեպքերն իրանական կողմի համար թվացել են շատ անհուսալի կամ օրհասական, բայց Իրանը 180 աստիճանով շուռ է տվել այդ ամենը»,- հավելեց նա:
Անդրադառնալով Սիրիա հումանիտար առաքելություն ուղարկելու Հայաստանի իշխանությունների որոշմանը՝ Վարդանյանը փաստեց, որ Իրանը պաշտոնապես առայժմ որևէ կերպ չի արձագանքել: Նրա խոսքով՝ ցանկալի կլիներ Սիրիայի հարցում համագործակցել Իրանի հետ կամ եռակողմ ձևաչափով՝ Ռուսաստան-Իրան-Հայաստան:
Առավել մանրամասն՝ տեսանյութում:
