Երևանի Մխիթար Հերացու անվան պետական բժշկական համալսարանի մի խումբ ուսանողների նամակը` ուղղված կրթության և գիտության նախարար Արմեն Աշոտյանին, արդեն հանձնվել է նրան: Այս մասին «Առաջին լրատվական»-ի հետ զրույցում նշեց ԿԳՆ հասարակայնության հետ կապերի վարչության պետ Արթուր Բաղդասարյանը:
«Նախարարությունը որևէ առնչություն չունի այդ վճարների հետ, ուղղակի դրանց օրինականության, մեխանիզմների առթիվ մենք նամակն ուղարկել ենք նախարարին, պիտի ուսումնասիրվի: Երբ պատասխանը պատրաստ լինի, մենք այն կտրամադրենք»,- ասաց նա:
Ուսանողները բողոքում են ցիկլային պարապմունքների ընթացքում բացակայությունների և հետագայում ցիկլը վճարովի հիմունքներով կրկնելու դեմ, նշում են, որ, ասենք, չորս շաբաթանոց ցիկլային պարապմունքի ընթացքում, եթե ուսանողը յուրաքանչյուր շաբաթում ունենում է նույնիսկ մեկ «անհարգելի» բացակա, պարտավոր է կրկնել ամբողջ 4 շաբաթն էլ՝ համապատասխանաբար վճարելով դրա համար: «Մենք դեմ չենք բացակայությունների լրացմանը, բայց ինչո՞ւ մեզ թույլ չեն տալիս լրացնել կոնկրետ բացակայած օրերի ժամաքանակը, այլ ստիպում են, որ ուսանողը հաճախի և կատարի վճարում ամբողջ շաբաթվա համար: Ի՞նչ է սա, եթե ոչ դրամաշորթություն: Չէ՞ որ ընդամենը մի քանի տարի առաջ ցիկլերի կրկնությունները կատարվում էին միայն անվճար հիմունքներով»,- ասում են նրանք, նաև նշում, որ ցիկլի կրկնության փաստը շատ ամբիոնների և դասախոսների ձեռքում վերածվում է հզոր զենքի՝ ուղղված ուսանողների, այս պարագայում՝ թույլ օղակի դեմ: Ցանկացած ամբիոն կամ դասախոս ուսանողի դեմ անձնական հակակրանք տածելու դեպքում կարող է նրա ցանկացած, անգամ չնչին սխալն օգտագործել, ասենք` լսարանից դուրս հրավիրել եւ բացակա դնել:
Բժշկական համալսարանից հղում կատարեցին ԵՊԲՀ ռեկտորի 2012 թ. մարտի 21-ի հրամանին, որով հաստատվել է «Բաց թողնված դասերի լրացման կարգը», որի համաձայն` եթե ուսանողը ուսուցման մասին պայմանագրով նախատեսված վարձավճարի սահմաններում և համալսարանի կողմից սահմանված ուսումնական ծրագրերով և ժամանակացույցով նախատեսված դասերից բացակայել է, համալսարանի կողմից նախատեսվում են լրացուցիչ վճարովի դասընթացներ` հետևյալ պայմաններով. ա) 2 շաբաթ և ավելի տևողությամբ առարկաների ցիկլային պարապմունքներից բացակայելու դեպքում ուսանողը պարտավոր է լրացնել յուրաքանչյուր բացակայած դասի 1 համապատասխան շաբաթը, բ) դասերի բացթողումը (բացակայելը) դասերին չներկայանալն է և այն բացակայությունները, որոնք նշանակվել են ուսանողի՝ դասերից ուշանալու պատճառով: Դասից ուշացում է դիտվում դասի մեկնարկից և դասամիջոցից հետո ուշացումը. գ) գործնական պարապմունքներին հաճախումների գրանցումը դասախոսի կողմից պետք է կատարվի դասի մեկնարկից հետո 5 րոպեի ընթացքում՝ ուսումնական մատյանում: Դասախոսություններից բացակայությունները գրանցվում են համապատասխան մատյաններում, դ) ուսանողի ներկայության դեպքում դասամատյանի համապատասխան վանդակում պետք է գրանցվի «ն» տառը, իսկ բացակայության դեպքում՝ «բ» տառը: Լրացուցիչ դասընթացների համար վճարման չափը որոշվում է՝ ելնելով ռեկտորի կողմից հաստատված յուրաքանչյուր առարկայի կրեդիտների գնացուցակից՝ համապատասխան ժամկետների համամասնական չափերով:
