Երդվյալ ատենակալները չորեքշաբթի մեղավոր են ճանաչել «Հայրեր հանուն արդարության» կազմակերպության ակտիվիստ Թիմ Հարիսին Մեծ Բրիտանիայի թագուհի Էլիզաբեթ II-ի դիմանկարը փչացնելու համար: Այս մասին հայտնում է RIA Novosti-ն:
Անցած տարվա հունիսին 42-ամյա Հարիսը Վեսթմինսթերյան աբբայությունում դրված դիմանկարի վրա ներկով գրել էր՝ Help («Օգնեցեք») բառը: Ռալֆ Հեյմանսի վրձնին պատկանող աշխատանքն աբբայության կողմից գնվել էր 160 հազար ֆունտով: Դիմանկարի վերականգնումը գնահատվել է 7.3 հազար ֆունտ:
Լոնդոնյան Սաութուորք շրջանի դատարանում չարագործն իր եզրափակիչ խոսքում հայտարարել է, որ ցանկացել է այդ կերպ հասարակության ուշադրությունը հրավիրել հայրերի սոցիալական աղետալի վիճակի վրա, որոնց թույլ չեն տալիս տեսնվել երեխաների հետ:
Fathers4Justice կազմակերպությունն ավելի վաղ հայտարարել էր, որ չի արտոնել Հարիսի գործողությունները:
Թիմ Հարիսի դեմ դատավճիռը կկայացվի փետրվարի 5-ին:
