Աշխարհում քրիստոնյաների թիվը 1910-2010 թթ. ավելացել է՝ 600 միլիոնից հասնելով 2.2 միլիարդի: Ընդ որում, քրիստոնյաների թիվն Ասիայում և Լատինական Ամերիկայում աճել է շատ ավելի արագ, քան Եվրոպայում: Այս մասին հայտնում է KAI գործակալությունը՝ հղում անելով ամերիկյան հետազոտական Pew Forum on Religion and Public Life կենտրոնին:
1910 թվականին քրիստոնյաների 2/3-ն ապրում էր Եվրոպայում, իսկ այժմ Քրիստոսի եվրոպացի հետևորդները կազմում են ողջ աշխարհում իրենց դավանակիցների ¼-ը:
Աշխարհի ևս մեկ տարածաշրջան, որտեղ քրիստոնյաների թիվը կրճատվել է,Մերձավոր Արևելքն ու Հյուսիսային Աֆրիկան են: Քրիստոնյաների թիվն այնտեղ գնահատվում է 13 միլիոն: Դա աշխարհում քրիստոնյաների ընդհանուր թվի 1 տոկոսից էլ քիչ է և կազմում է այդ տարածաշրջանի բնակիչների ընդամենը 4 տոկոսը: Այսպիսին է պատկերը քրիստոնեության օրրանում: Իսկ աշխարհի խոշորագույն իսլամական երկիր հանդիսացող Ինդոնեզիայում քրիստոնյաները գրեթե կրկնակի ավելի են՝ 24 մլն:
Բոլոր քրիստոնյաների կեսը կազմում են կաթոլիկները: Կաթոլիկների թվով ամենամեծ երկիրը Բրազիլիան է, որտեղ նրանք հաշվվում են 120 միլիոն:
