Հունվարի 13-ին ժամը 11:00-ին Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում կայանալիք դատական նիստում քննության են առնվելու Բուդաղյանների պաշտպան, փաստաբան Հայկ Ալումյանի երեք բողոքները:
«Առաջին լրատվական»-ի հետ զրույցում Ալումյանը նշեց, որ երկու բողոքները բերված են Տիգրան Խաչատրյանի և Զարզանդ Նիկողոսյանի նկատմամբ քրեական հետապնդումը դադարեցնելու մասին որոշումների, իսկ երրորդ բողոքը` Ավետիք Բուդաղյանի նկատմամբ քրեական հետապնդում չիրականացնելու մասին որոշման դեմ: Ըստ փաստաբանի` Ավետիք Բուդաղյանի նկատմամբ քրեական հետապնդում չիրականացնելու մասին որոշմամբ քննիչը հաստատված է համարել, որ Ավետիքը սպանության փորձ է կատարել, սակայն քրեական հետապնդում չի իրականացվել` նրա մահվան հիմքով:
«Այս դատավարության արդյունքում կամ բողոքարկվող որոշումները կվերացվեն, ինչը կնշանակի, որ այդ երկու անձինք կրկին կդառնան մեղադրյալ, և նախաքննությունը նրանց նկատմամբ կշարունակվի, կամ` բողոքներս կմերժվեն, և դրանով դատարանները կհաստատեն` քննիչը ճիշտ է արել, որ դադարեցրել է նրանց նկատմամբ քրեական հետապնդումը: Իսկ Ավետիքի նկատմամբ կայացված որոշումը եթե վերացվի, դա կնշանակի, որ դատարանը չի ընդունում քննիչի հետևություններն առ այն, որ Ավետիքն է հարձակվողը եղել»,- ասաց Ալումյանը:
Սյունիքի նախկին մարզպետ Սուրիկ Խաչատրյանի տան մերձակայքում 2013-ի հունիսի 1-ին տեղի ունեցած միջադեպի առնչությամբ գործի քննությանն անդրադառնալով` փաստաբանը նշեց, որ դատավարություն դեռևս չի ընթանում, գործը նախաքննության փուլում է, ընդ որում` ամեն ինչ անում են, որ գործը դատարան չհասնի: Ըստ նրա՝ որևէ դրական փոփոխություն դեռ չի նկատվում անգամ Հայաստանում ԱՄՆ արտակարգ և լիազոր դեսպան Ջոն Հեֆերնի` հունիսմեկյան իրադարձություններով հետաքրքրվելուց հետո: Փաստաբանը, սակայն, վճռական է տրամադրված: «Դեռ փոփոխություն չի նկատվում, բայց՝ կանենք ամեն ինչ, որ նկատվի»,- ասաց նա:
