«Առաջին լրատվական»- ի հետ զրույցում անդրադառնալով հարցին, թե ԱԱԾ տնօրենի և ՀՔԾ պետի խոսակցության գաղտնալսումը և հրապարակումը ինչ ազդեցություն կարող է թողնել Մարտի 1-ի գործով քննության և քաղաքականության վրա, ՀԱԿ փոխնախագահ Լևոն Զուրաբյանը նշեց. «Սա ուղղված է Հայաստանի իշխանության դեմ, այն գործընթացի դեմ, որը Հայաստանում գնում է. կոռուպցիայի դեմ անզիջում պայքար, Մարտի 1-ի բացահայտման գործընթացը, մենաշնորհների վերացում: Կան մարդիկ, որոնք, զարմանալի կլիներ, որ կատաղի դիմադրություն չցուցաբերեին… Սա վտանգավոր է, բայց մեծ ողբերգություն պետք չէ դարձնել»:
ՀԱԿ փոխնախագահը նաև ընդգծեց, որ ընդդիմությանը հետևելը և գաղտնալսելը «եղել է Ռոբերտի և Սերժի գործելաոճը»:
«Սրանով փորձում են վարկաբեկել Մարտի 1-ի բացահայտման գործընթացը: Սրանից օգտվել են Ռ. Քոչարյանը և նրանք, ովքեր դարձել են այս քննության գլխավոր օբյեկտը, ու սա օգտագործելու են և՛ իշխանության դեմ, և՛ Քննչական մարմնի դեմ»,- նշեց Զուրաբյանը:
«Քոչարյանը վայելում էր իր թալանած հարստությունները, և ինչ-որ պահից նոր իշխանությունը, տված խոստման համաձայն, բացեց Մարտի 1-ի գործը, քննության համար բոլոր ապացույցները կան, և Ռ. Քոչարյանը պետք է կանչվեր պատասխանության: Այդ պահից սկսած՝ նա սկսեց ակտիվ քաղաքական գործունեություն, որպեսզի խուսափի քրեական պատասխանատվությունից: Հիմա նա, ըստ էության, քաղաքական գործունեությամբ չի զբաղվում, միայն նրա փաստաբաններն են հայտարարություններով հանդես գալիս»,- նշեց Լ. Զուրաբյանը:
Նրա դիտարկմամբ՝ ՀՀԿ-ն արգելակելու է «շնաձկների» կալանավորումը և Մարտի 1-ի բացահայտումը, իսկ նոր իշխանությունը, ՀՔԾ-ն և ԱԱԾ-ն նվիրվարծ են Մարտի 1-ի բացահայտման գործին:
«Սերժ Սարգսյանը կարող է բացել ոճրագործության խոհանոցը, իսկ դա քննության համար շատ կարևոր է, և սա է, որ ի հայտ է բերելու Մարտի 1-ի ոճրագործներին»,- ընդգծեց ՀԱԿ փոխնախագահը:
Մանրամասն տեսանյութում:
