Այսօր՝ սեպտեմբերի 11-ին, ԱԺ հայտարարությունների ժամին «Ելք» խմբակցության պատգամավոր Լենա Նազարյանն անդրադարձավ ԱԱԾ պետի և ՀՔԾ պետի հեռախոսային խոսակցության գաղտնալսմանը և ձայնագրության տարածմանը:
«Գաղտնալսումից պարզ է մի բան՝ դատավորներին ոչ մի հրահանգ չի տրվել և չի տրվելու: Եղել է միայն մեկ ուղերձ՝ չվախենալ, չկասկածել, չենթարկվել հրահանգների, եթե կան օրինական հիմքեր՝ կալանավորել»,- հայտարարեց Լենա Նազարյանը:
Նրա խոսքով՝ գաղտնալսում կարող է կատարվել միայն համապատասխան պետական կառույցների կողմից՝ պետության և քաղաքացու շահերը պաշտպանելու համար. «Ցանկացած այլ դեպքում գաղտնալսումը գործիք է, որը օգտագործվում է պետության շահերի և ազատության խոսքի դեմ»:
Նա նշեց, որ եթե գաղտնալսում են ԱԱԾ պետին, ՀՔԾ պետին, ուրեմն կարող ենք մտածել, որ գաղտնալսում են նաև ՊՆ-ին, ԱԱԽ քարտուղարին. «Եվ ինչ իմանանք՝ արդյոք այդ գաղտնալսված նյութերը չե՞ն օգտագործվել մեր պետության դեմ»:
Պատգամավորը ընդգծեց, որ հանրությանը պետք է ներկայացվի, թե ովքեր են որոշել պետության մեջ պետություն լինել. «Այդ անձինք պատասխանատվության կարժանանան»:
Մանրամասները՝ տեսանյութում:
