Սուրբ Ծնունդը Հայ Առաքելական եկեղեցու հետ նույն օրը՝ հունվարի 6-ին, նշում են նաև Քաղկեդոնի ժողովը մերժած Ղպտի ուղղափառ եկեղեցին, Եթովպական ուղղափառ եկեղեցին, Ասորի ուղղափառ եկեղեցին և Հնդկաստանի Մալաբար ասորական ուղղափառ եկեղեցին: «Առաջին լրատվական»-ի հետ զրույցում այս մասին ասաց Տեր Ավետիս քահանա Դանիելյանը՝ միաժամանակ հավելելով, որ Հայ Առաքելական եկեղեցին Սուրբ Ծննդյան ու Աստվածահայտնության տոները նշում է միևնույն օրը:
Հոգևորականը հորդորեց չշեշտել կաթոլիկ և ռուս ուղղափառ եկեղեցիների՝ Սուրբ Ծննդյան տոնն այլ օրերի նշելու հանգամանքը, նկատելով, որ սա միայն բաժանություն է սերմանում: «Կարևորն այն է, որ սա Աստծո փառքի տոնն է, որի ժամանակ ուրախանում ենք և մենք՝ Առաքելական եկեղեցու հետևորդներս, և ուղղափառներն ու կաթոլիկները»,- ասաց նա:
Հարցին՝ ինչ պետք է անի եկեղեցին՝ հոգևոր տոների և կոնկրետ դեպքում Սուրբ ծննդյան խորհուրդն ու պատգամաները երիտասարդներին առավել հասանելի դարձնելու ուղղությամբ, Տեր Ավետիսը նկատեց. «Շատ դեպքերում մարդկանց տոների առանձին մանրամասներն ու տոմարական տարբերությունները մարդկանց չեն հետաքրքրում: Իրականության մեջ դրանք հետաքրքրական են նեղ մասնագետների համար: Կարևորն այն է, որ մենք ասում ենք՝ հունվարի 6-ին Սուրբ ծնունդ է և ժողովուրդն այդ օրը եկեղեցի է գալիս, մարդիկ գնում են միմյանց տներ ու միմյանց ավետիս տալիս՝ «Քրիստոս ծնաւ եւ յայտնեցաւ, ձեզ և մեզ մեծ աւետիս»: Հավատավոր մ,արդիկ ապրում են այդ օրով, մեծ շուքով տոնում այն: Սուրբ ծնունդն այն տոնն է, որի ժամանակ ժողովրդին ավտոբուսներով եկեղեցի չեն բերում, նրանք սիրով են գալիս՝ չնայած որ մրսում են եկեղեցիներում»,- ասաց Տեր Ավետիսը:
Հիշեցնենք, որ Հայ առաքելական եկեղեցին Հիսուս Քրիստոսի Սուրբ ծննդյան և Աստվածահայտնության օրը նշում է հունվերի 6-ին: Այդ օրն առավոտյան մատուցվում է Սբ. Պատարագ, որից հետո կատարվում է Ջրօրհնեք՝ Հիսուսի մկրտությունը: Պատարագիչը սուրբ Մյուռոն է կաթեցնում ջրի մեջ և օրհնում այն: Ժողովուրդն այդ ջրից տուն է տանում: Այնուհետև քահանան այցելում է մարդկյանց տներ՝ ավետելու Քրիստոսի ծնունդը: Այստեղից էլ առաջացել է Տնօրհնեքի սովորությունը:
