Սյունիքի մարզի ընդհանուր իրավասության դատարանում Նապոլեոն Օհանյանի նախագահությամբ ավարտվել է Աշոտ Ն.-ի գործի դատական քննությունը:
61-ամյա Աշոտ Ն.-ին մեղադրանք էր առաջադրվել ՀՀ քրեական օրենսգրքի 242 հոդվածի 3-րդ մասով՝ 2 մարդու մահվան պատճառ դարձած վթարի համար:
Ըստ մեղադրանքի՝ 2017 թվականի նոյեմբերի 25-ին, ժամը 18-ի սահմաններում Աշոտ Ն.-ն վարելով իր անձնական օգտագործման «ՎԱԶ- 21063» մեքենան, Երևան-Մեղրի ավտոճանապարհի 172-րդ կիլոմետրում՝ ճանապարհի շրջադարձային հատվածում տեխնիկական տեսակետից թույլ է տվել ՃԵԿ պահանջներին հակասող գործողություններ, արագությունը գերազանցել է, ենթարկվել է սահքի և բախվել է Սերժիկ Գ.-ի վարած «Ման» մակնիշի բեռնատարին, ինչի արդյունքում Աշոտ Ն.-ի մեքենայի ուղևոր Էլինա Ս.-ն տեղում մահացել է, իսկ երկրորդ ուղևորը՝ Աշոտ Ն.-ի քույրը՝ Անժելա Ն.-ն, տեղափոխվել է Էրեբունի բժշկական կենտրոն և ստացած վնասվածքներից մահացել է 2017 թվականի դեկտեմբերի 16-ին:
Առաջադրված մեղադրանքում Աշոտ Ն.-ն իրեն մեղավոր չի ճանաչել: Նա հայտնել է, թե քրոջ՝ Անժելայի հետ մեքենայով ուղևորվել է Կապան՝ այնտեղ բնակվող մյուս քրոջ՝ Ալինայի ամուսնու մահվան տարելիցին մասնակցելու համար:
Իր սանիկ Հայկը, իմանալով իրենց ուղևորության մասին, խնդրել է տատիկին՝ Էլինա Ս.-ին տանել իրենց ճանապարհին գտնվող Բարձրավան գյուղ: Ինքը չի մերժել:
Դեպքի օրը՝ 2017 թվականի նոյեմբերի 25-ի առավոտյան՝ ժամը 11-ի սահմաններում, Եղվարդից իր մեքենայով ուղևորվել են Կապան:
Ժամը 18-ի սահմաններում հասել են Սյունիքի մարզի «Զանգեր» կոչվող հատված:
Ճանապարհն այնտեղ սառցապատ էր ու վայրէջք ուներ: Ինքը մեքենան վարել է 20-30կմ/ժ արագությամբ: Հասնելով շրջադարձի սկզբնամաս՝ մեքենան ընկել է փոսի մեջ, ինքը կորցրել է կառավարումը, մեքենան սկսել է ճանապարհի երթևեկելի մասում պտտվել: Մի քանի վայրկյան անց մեքենան հարվածել է արգելապատնեշին ու կանգ է առել: Մինչև ինքը հասկացել է, թե ինչ է կատարվել, զգացել է երկրորդ հարվածը: Գիտակցության գալով՝ իջել է մեքենայից ու տեսել է, որ իր մեքենան գտնվում է բեռնատարի տակ… Բեռնատարում գտնվողներն են մոտեցել, նրանց օգնությամբ իր մեքենայից հանել են քրոջն ու արդեն մահացած Էլինա Ս.-ին:
Ամբաստանյալը նշել է, թե քննիչի թելադրանքով ու վատառողջ լինելու պատճառով է նախաքննական ցուցմունքի մեջ գրել, թե «Զանգեր» կոչվող հատվածում մեքենան վարել է 30-35 կմ/ժ արագությամբ, շրջադարձի սկզբնամասում մեքենայի տակ սառույցի կտոր է ընկել, ինչից ինքը կորցրել է մեքենայի կառավարումը, մեքենան սկսել է տեղում պտտվել, այդ ընթացքում երկու անգամ հարված է զգացել, ինչից հետո մեքենան կանգնել է:
Միևնույն ժամանակ ամբաստանյալը նշել է, թե քննիչն իրեն չի ուղղորդել, չի համոզել, իր նկատմամբ բռնություն չի գործադրել…
«Ման» բեռնատարի վարորդ Սերժիկ Գ.-ն հայտնել է, թե վարում է «Նիաշ» ՍՊԸ-ին պատկանող բեռնատարը:
2017 թվականի նոյեմբերի 25-ին իր բեռնատարը 19 տոննա պղնձի խտանյութ է բեռնել ու Քաջարանից շարժվել է դեպի Երևան: Մեքենան վարել է ինքը, իր հայրը նստած է եղել կողքին:
Սյունիքի մարզի Գորհայք գյուղի մոտ ճանապարհը եղել է սառցապատ, ինքը մեքենան վարել է իր ուղեմասով: Երթևեկության ժամանակ տեսել է, որ 80 մետր հեռավորության վրա գտնվող շրջադարձից սահելով ու պտտվելով՝ իր մեքենային է մոտենում մի «06»: Ինքն իր բեռնատարը մոտեցրել է աջակողմյան արգելապատնեշին ու արգելակել է: Բայց վայրկյաններ անց «06»-ը հետևի աջ կողմով բախվել է իր մեքենային ու մտել է իր մեքենայի տակ:
Ինքն ու հայրն անմիջապես իջել են, մոտեցել են «06»-ին, օգնել, մեքենայից հանել են վարորդին ու նրա կողքին նստած կնոջը: Քիչ անց վարորդն ասել է, թե իր մեքենայում մի ուղևոր էլ կա: Դրանից հետո «06»-ի հետևի նստատեղից հանել են տարեց կնոջ դիակ…
Բեռնատարի վարորդը նշել է, որ իր մեքենան դեպքի վայրում տեղաշարժել է իրավապահների ժամանելուց հետո՝ նրանց ցուցումով: Նաև նշել է, թե սառցապատ հատվածում մեքենան վարել է 10-15 կմ/ժ արագությամբ, իր մեքենան բեռ էր բարձած, ինքը վերելք էր բարձրանում, ավելի արագ չէր կարող վարել:
Դատաավտոտեխնիկական փորձաքննության եզրակացությամբ՝ «06»-ը սառցապատ ճանապարհի շրջադարձային հատվածում սահմանված՝ 24 կմ/ժ-ն չգերազանցող արագության փոխարեն դեպքի պահին շարժվել էր 40-50 կմ/ժ արագությամբ, «06»-ի վարորդը տեխնիկական տեսակետից թույլ է տվել ՃԵԿ պահանջներին հակասող գործողություններ, իրեն զրկել է տվյալ ճանապարհատրանսպորտային պատահարը կանխելու հնարավորությունից:
Դատարանը հաշվի է առել, որ Աշոտ Ն.-ն բնութագրվում է դրական, վատառողջ է, վատառողջ է նաև նրա կինը: Տուժողների իրավահաջորդները Աշոտ Ն.-ի նկատմամբ բողոք, նյութական պահանջ առաջ չեն քաշել, խնդրել են նրա նկատմամբ մեղմ վարվել:
Աշոտ Ն.-ն մեղավոր է ճանաչվել ՀՀ քրեական օրենսգրքի 242 հոդվածի 3-րդ մասով և դատապարտվել է 4 տարի իրական ազատազրկման՝ 3 տարով զրկվելով տրանսպորտային միջոցներ վարելու իրավունքից:
Պատժի սկիզբը կհաշվվի Աշոտ Ն.-ին փաստացի կալանքի տակ առնելու պահից, եթե այս դատական ակտն օրինական ուժի մեջ մտնի:
