Ինչը ստեղծեց անհրաժեշտություն օրենքով պայքարելու ընտրակաշառքների դեմ, և արդյո՞ք նախկինում ընտրակաշառքների ու ընտրախախտումների դեմը առնելու որևիցե լծակ չկար, «Առաջին լրատվական»-ի հարցին ԱԺ «Ելք» խմբակցության պատգամավոր Հայկ Կոնջորյանն ասաց․ «Բոլորս էլ քաջատեղյակ ենք, որ վերջին տասնամյակներում Հայաստանի քաղաքական համակարգի, մեր պետականության վրա իր բացասական վիթխարի ազդեցությունն է ունեցել ընտրակաշառքը, և ոչ միայն։ Ընտրությունների արդյունքների ձևավորման վրա իր բացասական ազդեցությունն է ունեցել նաև ապօրինի միջոցների ներգործությունը, որը ստեղծել էր մի այնպիսի իրավիճակ, որ Հայաստանում տեղի չէր ունենում իշխանափոխություն, և նույն իշխանությունը տարբեր դրսևորումներով էվոլյուցիայի էր ենթարկվում։ Ի վերջո, այս ամենը հանգեցրեց հեղափոխության, որ տրամաբանական շարունակության արդյունքն էլ այս օրինագծի ընդունումն էր»։
Հայկ Կոնջորյանը նաև ասաց, որ նախկինում ընտրակաշառքի վերաբերյալ Քրեական օրենսգրքում եղել են դրույթներ, սակայն ոչ այն կոնկրետությամբ, ինչպես այս օրինագիծը։
«Պետք է խոսենք ընտրությունները կեղծելու երեք մեխանիզմների մասին։ Մեկը հենց ընտրակաշառքն է, մյուսը՝ բարեգործությունն է, որն անուղղակի ընտրակաշառք է, և երրորդը՝ ադմինիստրատիվ լծակների կիրառումն է։ Նախորդ ընտրություններին այս երեք գործիքներով բազմիցս կեղծվել, խեղաթյուրվել են ընտրության արդյունքները։ Այս օրինագիծը երեքի վերաբերյալ էլ ունի դրույթներ, և այս երեք մեխանիզմների գործադրումն էլ արդեն քրեորեն պատժելի է նոր օրինագծով, ու կարծում եմ, որ սա շատ կարևոր քայլ է»,- հավելեց պատգամավորը։
Մանրամասները՝ տեսանյութում