Հայաստանում ոռոգման ջրի խնդիրը, կարծես, անլուծելի է թվում։ Գրեթե բոլոր մարզերում գյուղացիների հողերը մնացել են անջրդի։ Եթե Արարատի մարզում խնդիրը կապված է խոշոր հողատերերի առկայության հետ՝ Հովիկ Աբրահամյան, Ալիկ Սարգսյան և այլք, ապա Արմավիրի մարզում հարցն այլ է։
Մարզի Գեղակերտ համայնքի բնակիչները նախօրեին փակել էին Երևան-Արմավիր միջպետական ճանապարհը՝ պահանջելով լուծել ոռոգման ջրի հարցը։ «Առաջին լրատվական»-ը տեղում ծանոթացավ իրավիճակին։ Գյուղում ելակի սածիլման շրջան է, ինչն իրենից ենթադրում է ջրի առատության անհրաժեշտություն։
Գյուղացիները մեզ հետ զրույցում բողոքեցին՝ ոռոգման ջրի հարցը նոր չէ, տարիներով խնդիրն առկա է, մի կերպ են կարողանում ջրել հողերը, իրենց միջոցներով ջրհորներ են փորել, որտեղից էլ քիչ քանակությամբ ջուր են ստանում, սակայն դա էլ անսպառ չէ։
Տեղի բնակիչների տեղեկացմամբ՝ իրենք տարիներ առաջ արտեզյան ջրերով նորմալ կարողանում էին ջրել, խողովակները վաճառեցին, ամեն ինչ քանդեցին ու գյուղացուն թողեցին դժվար իրադրության մեջ։ Գյուղում մշակում են հիմնականում ելակ, որից ստանում են եկամուտի մեծ մասը, կարտոֆիլ, վարունգ, պոմիդոր և այլն։
Մանրամասները՝ տեսանյութում
