«Բարգավաճ Հայաստան» կուսակցության նախագահ Գագիկ Ծառուկյանի թիկնազորի պետ Էդուարդ Բաբայանը քիչ առաջ ազատ է արձակվել քրեակատարողական հիմնարկից, Aysor.am-ին տեղեկացրեց Բաբայանի փաստաբան Արմեն Մելքոնյանը։
«Հիմա ուր որ է կհասնի տուն», – ասաց փաստաբանը։
Նա տեղեկացրեց, որ Բաբայանի խափանման միջոց կալանքը փոխելու մասին Երևանի ընդհանուր իրավասության դատարան միջնորդություն են ներկայացրել, և դատարանը որոշել է գրավի դիմաց ազատ արձակել Բաբայանին։
«20 մլն դրամ գրավի և բարի խոսքերի դիմաց իմ պաշտպանյալը ազատ արձակվեց», – ասաց Մելքոնյանը։
ՀՔԾ-ն ավելի վաղ տեղեկացրել էր, որ Էդուարդ Բաբայանին մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 6-րդ կետով նախատեսված այն հանցավոր արարքի կատարման համար, որ վերջինս խմբի կազմում հարվածներ է հասցրել և դիտավորությամբ կյանքին վտանգ սպառնացող ծանր վնաս հասցրել Վյաչեսլավ Հարությունովին:
Բաբայանը կալանավորվել էր հուլիսի 5-ին։
