Հայաստանի Հանրապետության վիճակագրական կոմիտեն հրապարակել է 2018թ. հուլիս ամսվա սոցիալ-տնտեսական վիճակը բնութագրող ընթացիկ օպերատիվ ամփոփմամբ ստացված նախնական մակրոտնտեսական ցուցանիշները: Համաձայն վիճակագրական կոմիտեի՝ 2018թ. հուլիսին նախորդ տարվա հուլիսի նկատմամբ տնտեսական ակտիվության ցուցանիշի աճը կազմել է 11.1%: 2018թ. հունվար-հուլիս ժամանակային միջակայքում նախորդ տարվա նույն ժամանակամիջոցի համեմատությամբ աճը եղել է 9.3%: Հուլիսին նախորդ ամսվա՝ հունիսի նկատմամբ արձանագրվել է 8%-անոց աճ: Բոլոր դեպքերում էլ ունեցել ենք աճ 10 տոկոսի շրջակայքում, որը ոգևորող է:
Ամենաբարձր աճը գրանցվել է արտաքին առևտրաշրջանառության մեջ՝ գրեթե 27%: Ընդ որում, ներմուծումն աճել է ավելի քան 32%-ով, արտահանումը՝ 17%-ով: Աճի տեմպերով հաջորդում է ծառայությունների ոլորտը՝ գրեթե 19%: Երրորդը շինարարությունն է՝ արձանագրած 10.4%-անոց ցուցանիշով: Արդյունաբերության մեջ աճի տեմպերը որոշակիորեն անկում են արձանագրել, այդուհանդերձ այն կազմել է 4.3%: Գյուղատնտեսության մեջ կարծես նկատվում է ցուցանիշների կայունացում: Հունվար-հուլիսի միջակայքում այն կազմել է 4.6%, իսկ 2017թ. հուլիսին արձանագրված աճի նկատմամբ այս տարվա աճը ավելի քան կրկնակի է:
Միջին ամսական անվանական աշխատավարձն աճել 4.0%-ով, որն ամենաբարձրն է վերջին ամիսներին: Ընդ որում, պետական հատվածում աճը կազմել է 1.1%, մասնավորում՝ 4.3%: Ամենափոքր աճերից մեկը գրանցվել է էլեկտրաէներգիայի արտադրության մեջ, որ անցած տարվա նույն ժամանակամիջոցի համեմատությամբ կազմել է 0.8%: Սպառողական գների տատանումը եղել է թույլատրելի 4%-ի միջին հատվածում՝ 2.4%:
Ելնելով այն հանգամանքից, որ, որպես կանոն, հեղափոխական զարգացումներից հետո հեղափոխվող երկրների տնտեսությունները մեծամասամբ ընդգծված անկումային, վայրիվերումներով լի դինամիկա են արձանագրում, իսկ Հայաստանի պարագայում որոշ ճյուղերում ընդամենը աճի միտումների ոչ մեծ նվազում է արձանագրվել, որոշ ճյուղերում էլ՝ վերելք, ինչպես նախորդ բոլոր տարիներին, կարելի է հետևություն անել, որ տնտեսությունը կայուն է, տնտեսական-քաղաքական միջավայրում դրական սպասումներ են, հետևաբար և դրական իմպուլսներ են ձևավորվել, որ կարող են որոշակիորեն «խաթարվել» առաջիկա խորհրդարանական ընտրությունների հետ կապված: Բայց քանի որ սպասումներն ու դաշտը դրական են, սրանց ազդեցությունը պետք է որ մեծ չլինի, եթե, իհարկե, քաղաքական դաշտում լուրջ ցնցումներ չլինեն:
