Հուլիսի 14-ին Արցախի նախկին փոխվարչապետ Արթուր Աղաբեկյանը ֆեյսբուքի իր էջում տեղեկացրել էր, որ խուզարկություն է կատարվել Մեծ Թաղեր գյուղում գտնվող իր հայրական առանձնատանը: Խուզարկության նպատակը, ըստ նրա, 2016 թվականի ապրիլին Հայաստանից և արտերկրից ստացված օգնություններ և օրենքով արգելված այլ իրեր հայտնաբերելն է։ Նա նաև նշել է, որ Երևան քաղաքի ընդհանուր իրավասության դատարանը 10.07.2018թ. որոշմամբ բավարարել է ՀՀ հատուկ քննչական ծառայության խուզարկություն կատարելու միջնորդությունը. «Համաձայն դատարանի վերը նշված որոշման՝ ես, իբր, յուրացրել եմ տրամադրված օգնությունը, որի մի մասն էլ փոխանցել եմ Մանվել Գրիգորյանին։ «Այս աստիճան խայտառակ և շինծու մեղադրանքները կարելի է սպասել միայն չկայացած դատաիրավական համակարգից»,- հավելել էր նա:
Արցախի գլխավոր դատախազ Արթուր Մոսիյանը օրերս հրավիրած մամուլի ասուլիսինանդրադարձել էր այս խուզարկությանը՝ նշելով, որ որևէ արտառոց բան չի կատարվել, և Արցախի դատախազությունը իր գործառույթը կատարել է ամբողջությամբ՝ օրենքի և գործող համաձայնագրի շրջանակներում: Արթուր Մոսիյանը խուզարկությունը հիմնավորել էր նրանով, որ Հայաստանի և Արցախի դատախազությունների միջև գոյություն ունի համաձայնագիր՝ փոխադարձ իրավական օգնություն ցույց տալու։
Արթուր Աղաբեկյանին չի բավարարել Արցախի գլխավոր դատախազի մեկնաբանությունը։ «Առաջին լրատվական»-ի հետ զրույցում Արթուր Աղաբեկյանը նշեց, որ խնդիրը գտնվում է իրավական դաշտում, ոչ մամուլի ասուլիսների։ «Այդ հարցի պատասխանը դատապաշտպանին պետք է բավարարի կամ չբավարարի։ Եթե իրավական գործընթաց է գնում, թող գնա, տեսնենք՝ ինչ շարունակություն է ունենալու»,- ասաց նա՝ այլևս չցանկանալով խոսել։ «Ուզում ես խախտել իմ լռությունը, եկեք էլ չխոսենք»,- ասաց Արթուր Աղաբեկյանը։
