«Եթե դա տեղի ունենա, ես չէի ասի, թե Քոչարյանը վերադարձել է քաղաքականություն, ես կասեի՝ նրան քարշ տալով մտցրել են քաղաքականություն։ Ստացվում է, որ մարդը, ով տեսանելի ձևով քաղաքականության մեջ չէր, այս ամենի հետևանքով ներքաշվում է քաղաքականության մեջ»,- «Առաջին լրատվական»-ի հետ զրույցում նման տեսակետ հայտնեց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը՝ պատասխանելով մեր այն հարցին՝ արդյոք տեղի ունեցածը Քոչարյանի համար մեծ քաղաքականություն վերադառնալու հնարավորություն է ստեղծում։
Իսկանդարյանը նշում է՝ նման հարցում չի կարող չլինել քաղաքական գործոն. «Երբ դատում են նախկին նախագահին 2008-ի մարտիմեկյան իրադարձությունների համար և դատում են իշխանափոխությունից հետո, ապա չի կարող քաղաքական գործոն չլինել։ Եվ ստացվում է, որ Քոչարյանը, որը չկար քաղաքականության մեջ, ներքաշվում է քաղաքականության մեջ։ Բայց ես չգիտեմ, որը կլինի իր որոշումը, եթե որոշի մասնակցել ու ինչ-որ կերպ իրեն դրսևորել քաղաքականության մեջ, ապա չեմ կարծում, թե այսօրվա դրությամբ շատ լավ հնարավորություններ ունի»։
Հետաքրքրվեցինք նաև, թե արդյոք նրա ազատ արձակման հարցում ինչ-որ դերակատարություն է ունեցել նաև Մոսկվան, որը ԱԳ նախարար Սերգեյ Լավրովի մակարդակով ավելի վաղ ներհայաստանյան թեմաների շուրջ հայտարարություն էր արել։
«Մոսկվան իր մտահոգությունն է հայտնել և դա շատ վառ երևաց պարոն Լավրովի հայտարարության մեջ։ Ռուսաստանն ավելի շատ մտահոգված էր ոչ թե Քոչարյանի, այլ Խաչատուրովի մասով, իսկ Հայաստանի իշխանությունները չեն կարող հաշվի չառնել այդ մտահոգությունը։ Ռուսաստանը անվտանգության հարցով կարևոր գործընկեր է, և այն, որ պարոն Խաչատուրովը հիմա Մոսկվայում անցել է աշխատանքի, այդ մտահոգության հետևանքն է։ Այլ հարց է, որ ես ընդհանրապես չեմ մտածում, որ Մոսկվայից դատավորներին չեն զանգել, Լավրովը դատավորներին չի զանգել, ուղիղ ճնշում չի եղել։ Չեմ կարծում, թե դա անհրաժեշտ է»։
Հարցազրույցն ամբողջությամբ՝ տեսանյութում։
