Նախկին վարչապետ Հովիկ Աբրահամյանը հայտարարել է, որ ինքը որևէ կապ չունի թե տարածքի, թե զենքերի հետ, որ հայտնաբերել է ԱԱԾ-ն և որի մասին հայտարարել են, ասելով, թե տարածքը փաստացի պատկանում է Աբրահամյանին: Ինչպես հայտնի է, ապօրինի զենքի համար ձերբակալվել է նաև Հովիկ Աբրահամյանի եղբայր Ջոնիկ Աբրահամյանը: Նախկին վարչապետը այժմ հայտարարում է, որ կապ չունի ոչնչի հետ և չգիտե, թե ինչպես են զենքերը հայտնվել այդ տարածքում: Հովիկ Աբրահամյանը ունի դրա իրավունքը, նա պաշտպանվում է հնարավոր մեղադրանքից: Եվ այստեղ խնդիրն իրավապահների, տվյալ դեպքում ԱԱԾ դաշտում է, որը պետք է ապացուցի տարածքի պատկանելությունը Հովիկ Աբրահամյանին, ու նաև զենքերի հետ նրա կամ նրա թիկնազորի առնչությունը, հաշվի առնելով ԱԱԾ պետի ակնարկը, որ այդ զենքերը հնարավոր է Մարտի 1-ին օգտագործել է ինչ-որ մեկի թիկնազորը: Մարտի 1-ի գործով իրավական հիմնավորումների հարցը կարծես թե դառնում է ավելի ու ավելի շոշափելի: Մի կողմից ակնհայտ է, որ տեղի է ունեցել հանցագործություն հասարակության և պետության դեմ, մյուս կողմից սակայն հասարակությունը դեռևս կարծես թե չի ստանում այն համոզիչ փաստարկներն ու ապացույցները, որոնք նաև ուղղակի կզրկեին հնարավոր կասկածյալների կամ մեղադրյալների վկաներին ավելորդ մանիպուլյատիվ հնարքների կիրառման հնարավորությունից: Հենց այս նկատռառումը հաշվի առնելով, այսօրվա քննարկումը մենք կփորձենք պահել զուտ իրավական հարթությունում, հատկապես այն հարցերի շրջանակում, որոնք այս օրերին երկիմաստ մեկնաբանությունների են արժանանում:
Թեմայի շուրջ «Առաջին լրատվական»- ի հետ քննարկմանը մասնակցեցին փաստաբաններ Տիգրան Եգորյանը, Մուշեղ Շուշանյանը և Լուսինե Հակոբյանը:
Անդրադառնալով Ռ. Քոչարյանի պաշտպանների այն հայտարարությանը, թե իրենց պաշտպանյալը սահմանադրական կարգ չի խախտել, Մ. Շուշանյանը նշեց, որ այդ հայտարարությունը փաստարկված չէ. «Քոչարյանի պաշտպանների հայտարարությունը դեկլարատիվ բնույթ ունի: Նրա պաշտպանները պնդում են, որ Ռ. Քոչարյանի նկատմամբ քրեական հետապնդում չի կարող իրականացվել, բայց այդ հարցին քանիցս հիմնավոր կերպով անդրադարձ է կատարվել և հիմնավորվել է, որ այն մեղադրանքի կապակցությամբ, որը ներկայացվել է Ռ. Քոչարյանին, նա անձեռնմխելիությունից օգտվել չի կարող»:
Տիգրան Եգորյանի խոսքով՝ Ռ. Քոչարյանի մեղադրանքը շատ ավելի խորն է, քան այս օրերին քննարկվում է: Փաստաբանի խոսքով՝ 2008-ին ընտրական գործընթացին այնպիսի անթույլատրելի միջամտություն է տեղի ունեցել, որը խախտում է Սահմանադրության 1-ի, 2-րդ, 3-րդ, 4-րդ և 5-րդ հոդվածները:
Դրանից հետո հայտարարվել է արտակարգ դրություն, որը դիտարկվում է որպես փաստացի ռազմական դրություն: Իսկ Սահմանդրությունն արգելում է ընտրությունների իրականացումը արտակարգ և ռազմական դրությունների պարագայում»:
Մ. Շուշանյանի դիտարկմամբ՝ 2008թ-ին տեղի է ունեցել ժողովրդի իշխանության յուրացում. «Այն իրականացվել է հանցավոր համագործակության կողմից, որը նաև պետությունն էր զավթել: Այդ գործընթացում խախտվել է թե՛ Սահմանադրությունը, թե՛ Օրենքը»:
Քննարկման մասնակիցների խոսքով՝ 0038 հանցավոր հրամանի թիվ մեկ պատասխանատուն Գերագույն գլխավոր հրամանատարն է:
Մանրամասն՝ տեսանյութում:
