Արագածոտնի մարզի Ոսկեվազ համայնքի ՕԵԿ-ական 26 տարվա գյուղապետ Հայկ Հովհաննիսյանը հաճույքով է աշխատում նոր կառավարության հետ, օգոստոսի 17-ի հանրահավաքին էլ մասնակցելու է։ «Չգիտեմ՝ ով ո՞նց կմեկնաբանի, բայց ես միշտ աշխատել եմ ծառայել իմ ժողովրդին, ես սիրում եմ ծառայել ժողովրդին։ Կոռուպցիայից հեռու մարդ եմ, սիրում եմ մաքուր աշխատել։ 26 տարի է գյուղապետ եմ, բայց Հանրապետական չեմ եղել»,- «Առաջին լրատվական»-ի հետ զրույցում ասաց Հովհաննիսյանը, ապա ավելացրեց՝ բոլոր իշխանությունների օրոք էլ աշխատել է, իրեն շատ են համոզել անդամակցել ՀՀԿ-ին, սակայն, ապարդյուն։
Հովհաննիսյանը նշեց՝ այլ կուսակցության երբևէ չի անդամակցի, անգամ վարչապետ Նիկոլ Փաշինյանի Քաղաքացիական պայմանագրին, ինչքան էլ նոր իշխանությունների հետ սիրով է աշխատում։ Գյուղապետի վստահեցմամբ՝ նոր Կառավարության օրոք կոռուպցիան վերացել է, որն ամենակարևորն էր։ «Ես հուսով եմ տնտեսությունը կզարգանա, ներդրումներ կլինեն, փայատերեր չեն լինի, ճնշողներ չեն լինի »,- ասում է Հովհաննիսյանը։
Խոսելով մարտի 1-ի բացահայտման մասին գյուղապետը նախ հիշեց՝ այդ օրերին իրենց գյուղից մասնակիցները շատ են եղել, վրաններ էին խփել Ազատության հրապարակում, ապա ավելացրեց՝ բոլորը պետք է պատասխան տան, կապ չունի թե ով է դատապարտվելու՝ հանրապետության նախագահը թե ուրիշ մարդ․ «Եղավ այն, ինչ եղավ, 10 զոհ․․․Ում մի ձեռքի հարվածով կամ մի խոսքով արյուն է թափվել, պետք է բոլորը պատասխան տան»։
Խոսելովց Ոսկեվազի խնդիրների մասին, գյուղապետն առանաձնացրեց հրատապ հարցը՝ ոռոգման ջրի խնդիրը։ Գյուղացիների այգիները չորացել են, ապրուստի միակ միջոցը՝ հողագործությունն է, սակայն ոռոգման համակարգի չլինելու պատճառով գյուղացիները կանգնել են լուրջ խնդրի առաջ։
Հարցազրույցն ամբողջությամբ՝ տեսանյութում
