ԱՄՆ նախագահ Դոնալդ Թրամփը կշարունակի Չինաստանի վրա ճնշում գործադրել՝ փորձելով նրանից առևտրի հարցում զիջումներ կորզել։ Այս մասին հայտարարել է Bloomberg-ը՝ վկայակոչելով Սպիտակ տան տնտեսական հարցերով խորհրդական Լարի Քուդլոուին։
«Նրանց տնտեսությունը թույլ է, նրանց արժույթը թույլ է, մարդիկ լքում են երկիրը։ Պետք չէ թերագնահատել մինչև վերջ գնալու նախագահ Թրամփի վճռականությունը»,-ասել է Քուդլոուն։
Նրա խոսքով՝ ԱՄՆ-ն առևտրային բարեփոխումներ էր ցանկանում, ոչ թե պատերազմ։
Պարբերականը նշում է, որ Չինաստանը ևս ակնարկել է, որ մտադիր չէ ԱՄՆ-ի հետ առևտրային պատերազմում զիջումների գնալ։ Չինաստանի իշխանությունները զգուշացրել են, որ 60 մլրդ դոլարի ապրանքների ցանկ են պատրաստել, որոնց նկատմամբ պատասխան մաքսատուրքեր կսահմանվեն։ Այդ ցանկում 5․2 հազար ամերիկյան ապրանքներ կան, որոնց նկատմամբ 5-25 տոկոս մաքսատուրք կսահմանվի։
