Գործադիրը հավանություն տվեց ԱԺ «Ծառուկյան դաշինք» խմբակցության մի խումբ պատգամավորների օրենսդրական նախաձեռնության կարգով ներկայացրած «Արհեստակցական միությունների մասին» ՀՀ օրենքում փոփոխություններ կատարելու մասին» ՀՀ օրենքի նախագծի վերաբերյալ կառավարության առաջարկությանը:
ՀՀ աշխատանքի և սոցիալական հարցերի նախարար Մանե Թանդիլյանը նշեց, որ նախագծով, մասնավորապես, առաջարկվում է սահմանել անկախ արհմիություն ստեղծելու և դրան անդամակցելու հնարավորություն, ինչը հասանելի լինի տարբեր գործատուների մոտ աշխատող ամենատարբեր մասնագիտություններ ունեցողների համար, եթե արհեստակցական միություններին անդամակցելը տվյալ կատեգորիայի աշխատողների համար արգելված չէ օրենքով: «Այդպիսով, անկախ արհեստակցական կազմակերպությունը կախվածություն չի ունենում որևէ գործատուից և ֆինանսավորվում է բացառապես աշխատողների անդամավճարներով և օրենքով չարգելված ցանկացած այլ աղբյուրից, բայց ոչ գործատուի միջոցներից, ինչը լիարժեք ու ինքնուրույն գործելու ողջամիտ հեռանկար է ստեղծում արհեստակցական միության համար»,- ասաց Թանդիլյանը: Ըստ հիմնավորման, օրինագծի ընդունման արդյունքում կապահովվի աշխատողներին միավորող արհեստակցական միության լիարժեք անկախությունը, կբարձրանա աշխատողներին միավորող արհեստակցական միության նկատմամբ վստահությունը, կընդլայնվի աշխատողների խախտված կամ վիճարկվող իրավունքների հասարակական պաշտպանության շրջանակը և էապես կթեթևացնի նրանց աշխատանքային իրավունքների դատական պաշտպանության հետ կապված բեռը:
Կառավարությունը օրենքի նախագծի վերաբերյալ առաջարկություններ չի ներկայացրել: Իսկ եզրակացության համաձայն՝ նախագծի ընդունումը չի հանգեցնի պետական բյուջեի եկամուտների և ծախսերի փոփոխության: «Նախագիծն ընդունելի է և որոշակիորեն հնարավորություն է տալիս արհեստակցական միություններին ունենալ անկախություն»,- ասաց Թանդիլյանը:
