ԱԱԾ-ն հերթական բացահայտումն է արել՝ այս անգամ զինված ուժերում. փորձ է արվել զինծառայությունից ապօրինի ազատել 40-ից ավելի նորակոչիկների:
Այս առնչությամբ զինվորական գործերով մասնագիտացած փաստաբան Նորայր Նորիկյանը «Առաջին լրատվական»-ի հետ զրույցում ասաց. «Միայն հրապարակված թիվը, որ միայն 11 դեպքում 14 հազար դոլարի մասին է խոսքը, վկայում է այն մասին, որ այդ համակարգը իսկապես հիվանդ է, և այդտեղ անհրաժեշտ է արմատական վերանայումներ կատարել»:
Նրա կարծիքով՝ զինված ուժերի համալրման գործընթացում «պարտադիր» բաղադրիչը պետք է վերանայվի. «Ինձ համար անթույլատրելի է, որ Կենտրոնական բժշկական հանձնաժողովի նախագահը ՀՀ զինկոմիսարն է: ՊՆ-ն և Զինված ուժերը հետապնդել և հետապնդում են գերատեսչական շահ, և նրանց միակ խնդիրը պլան կատարելն է: Եվ այդ ընթացքում իրականացվում է կոռուպցիոն սխեմա»:
Նորայր Նորիկյանը կարծում է, որ ՀՀ Զինված ուժերի համալրման գործընթացը ապահովող իրավական նորմերը թերի են, ինչը հնարավորություն է տալիս տարբեր մարդկանց կոռուպցիոն սխեմաների միջոցով ամբողջ համակարգը կոռումպացնել:
«Այս ծավալի բացահայտումը խոսում է անպատժելիության մթնոլորտի մասին: Պետք է իրականացվի մաքրման գործընթաց, և դա պետք է իրականացնեն մաքուր ձեռքեր ունեցող մարդիկ»,- նշեց փաստաբանը՝ տագնապեցնող համարելով այն հանգամանքը, որ ԱԱԾ-ի բացահայտած 40 դեպքը տեղի է ունեցել 2018թ. ամառային զորակոչի ընթացքում, ինչը նշանակում է, որ հեղափոխությունից հետո այս համակարգը ոչ միայն գործում է, այլև լրջագույն ծավալներ է ներառում:
Մանրամասները՝ տեսանյութում: