Արարատի և Վայոց Ձորի մարզերի ընդհանուր իրավասության դատարանում Գրիգոր Հովհաննիսյանի նախագահությամբ ավարտվել է Արթուր Ղազարյանի գործի դատական քննությունը:
36-ամյա Արթուր Ղազարյանին մեղադրանք էր առաջադրված լրագրողի մասնագիտական գործունեությանը բռնության գործադրմամբ խոչընդոտելու համար՝ ՀՀ քրեական օրենսգրքի 164 հոդվածի 1-ին մասով:
Ըստ մեղադրանքի՝ Թավշյա հեղափոխության օրերին՝ 2018 թվականի ապրիլի 21-ին, ժամը 15-ի սահմաններում Երասխ-Երևան մայրուղու Արտաշատ քաղաքի հատվածում տեղի ունեցող ավտոերթի ընթացքի նկարահանման և լուսաբանման ժամանակ Արթուր Ղազարյանը ձեռքով հարվածել է մասնագիտական լրագրողական գործունեությունն իրականացնող՝ «Ազատություն» ռադիոկայանի լրագրող Արուս Հակոբյանի ձեռքի տեսախցիկին, այնուհետև ձեռքով մեկ անգամ էլ հարվածել է լրագրողուհու դեմքին՝ նրան պատճառելով ֆիզիկական ցավ, ինչով խոչընդոտել է լրագրողի մասնագիտական օրինական գործունեությանը:
Արթուր Ղազարյանն իրեն լիովին մեղավոր է ճանաչել, զղջացել է: Տուժողը քաղաքացիական հայցի պահանջ չի ներկայացրել:
Դատարանը հաշվի է առել, որ ամբաստանյալն ընդունել է մեղքը, զղջացել է, նրա խնամքին են 3 անչափահաս որդիները՝12, 9 և 5 տարեկան: Երեխաներից մեկը վատառողջ է, պարբերաբար բուժում է ստանում արտերկրում…
Դատարանը հաշվի է առել նաև, որ Արթուր Ղազարյանը նախկինում դատված չէ, բարձրագույն կրթություն ունի, Արտաշատի ՋՕ ընկերության տնօրենն է:
Արթուր Ղազարյանը մեղավոր է ճանաչվել ՀՀ քրեական օրենսգրքի 164 հոդվածի 1-ին մասով և դատապարտվել է տուգանքի՝ 250 հազար դրամի չափով:
Արթուր Ղազարյանի խափանման միջոց՝ չհեռանալու մասին ստորագրությունը վերացվել է՝ չսահմանափակելու համար նրա ելքը Հայաստանի Հանրապետությունից՝ վատառողջ երեխայի շահերից ՝ նրան բուժման նպատակով Գերմանիա տանելու անհրաժեշտությունից ելնելով:
