«Առաջին լրատվական»- ի հետ զրույցում ՀՀ ՊՆ մամլո խոսնակ Արծրուն Հովհաննիսյանը և ռազմական փորձագետ Մհեր Հակոբյանն անդրադարձան պաշտպանության նախարար Դավիթ Տոնոյանի՝ օրերս հրապարակած ծավալուն հոդվածին, որտեղ նախարարը խոսել է նաև իմացական վերափոխման մասին:
«Փաստաթուղթը, որը մենք անվանում են տեսլական, իրականում դոկտրինալ փաստաթուղթ է, ուղենշային, հասցեական և թիրախային մտքեր կան այնտեղ: Հասարակության համար շատ նորություններ է պարունակում: Դ. Տոնոյանը առաջ է քաշել նոր չափանիշ, որ բանակը պետք է լինի մարդակենտրոն, մարդը պիտի լինի ավելի բարձր ու բացարձակ արժեք՝ անկախ նրանից զինվոր է, թե սպա: Պետք է լինի կրթված, իր իրավունքների և պարտականությունների նկատմամբ բարձր գիտակցումով և միևնույն ժամանակ իր ծառայությունը պետք է համարի ոչ թե պարտականություն, այլ առաքելություն: Պետք է ենթականերին որպես անհատների վերաբերվել, պետության կողմից տրվող միջոցները պետք է խնայողաբար և էֆեկտիվ օգտագործվեն»,- նշեց Արծրուն Հովհաննիսյանը:
Մհեր Հակոբյանի դիտարկմամբ՝ քաղաքական հայտնի իրադարձությունները փոփոխության քամի բերեցին բոլոր ոլորտներում: «Հայկական ԶՈւ-ում միշտ անհատն է եղել բանակի բջիջը, և այդ բջիջներն ամրացնելով՝ փորձ է արվել մեկ ամբողջական միավոր դարձնել: Բայց մարդակենտրոնությունից որոշակի նահանջ կատարեցինք և կարծես ավելի շատ կոլեկտիվության մեջ ընդգրկվեցինք: Բայց հայ ամեն զինվոր անհատ է: Առաջնագծում միայնակ մնացած շարքային զինվորը դառնում է ինքն իր գեներալը, այս համակարգում, որն առաջարկվում է պաշտպանության նախարարի տեսլականով, Հյուգոյի այս միտքը լիարժեք արտացոլվում է»,- նշեց ռազմական փորձագետը՝ հավելելով, որ մեր բանակը սովետական մոդելից դուրս կգա՝ դառնալով արևմտյան ոճի ճկուն ռազմական համակարգ:
«Կոռուպցիան ինքնին չարիք է պետության գործունեության ցանկացած ոլորտում, սակայն այն կրկնակի աղետ է ռազմական բնագավառում, աղետ, որը չսանձահարման դեպքում կարտահայտվի մարտի ժամանակ խափանված կրակոցի, հավաքակայանից դուրս գալ չկարողացող տեխնիկայի, զինվորի համար անհրաժեշտ կալորիականություն չպարունակող սնունդի տեսքով». անդրադառնալով Դ. Տոնոյանի հոդվածում նշված այս դիտարկմանը՝ Արծորւն Հովհաննիսյանը նշեց, որ կոռուպցիան կործանարար նշանակություն ունի, իսկ բանակում դա արտահայտվոմ է կիսատ-պռատ տեխնիկայով ու սնունդով, իսկ դա կարող է հասցնել ընդհատված կյանքի, մինչև իսկ պետության պարտության: Հովհաննիսյանի դիտարկմամբ՝ կոռուպցիայի բարձր մակարդակ ունեցող բանակը չի կարող հաղթել անգամ անսահմանափակ ռեսուրսների առկայությամբ:
Մանրամասները՝ տեսանյութում:
