Ընդդիմադիր «Ժառանգություն» կուսակցության նախկին նախագահ, կուսակցության վարչության անդամ Րաֆֆի Հովհաննիսյանը «չի ցանկանում, որ ժողովրդի ծոցից դուրս եկած մի ուժը մրցակցի մեկ այլ ուժի հետ»։ Ըստ Հովհաննիսյանի՝ առաջիկա արտահերթ խորհրդարանական ընտրություններին պետք է մասնակցել մեկ ընդհանուր համաժողովրդական ցուցակով։ «Ես կողմնակից եմ, որ լինի ընդհանուր ցուցակ, որ անշրջելիորեն արտահայտվեն հեղափոխության արդյունքները։ Առաջարկը ուժի մեջ է։ Մենք առաջարկ ենք արել և հուսով ենք, որ թե՛ վարչապետը, թե՛ իր կուսակցությունը և այլ ուժեր, քաղաքացիական շարժումներ, միասին հանդես կգան։ Ես չեմ ուզում գնանք սուպերկուսակցության ճանապարհով»,- ընդգծել է Հովհաննիսյանը «Առաջին լրատվական»-ի հետ զրույցում։ Ի դեպ՝ այս օրակարգով «Ժառանգություն» կուսացկության նախագահ Արմեն Մարտիրոսյանն այս օրերին քննարկումներ է վարում տարբեր քաղաքական ուժերի հետ։
Նախկին քաղբանտարկյալ, «Հայաստանի կառուցողական կուսակցության» հիմնադիր Անդրիաս Ղուկասյանը «Առաջին լրատվական»-ի հետ զրույցում ասաց, որ իրենց հետ առայժմ քննարկումներ այդ հարցի շուրջ չեն անցկացրել. «Կարծում եմ՝ առայժմ վաղ է խոսել մեկ միասնական ցուցակի մասին, դեռ հայտնի չէ, թե երբ են անցկացվելու արտահերթ խորհրդարանական ընտրությունները»։ Անդրիաս Ղուկասյանը, միևնույն ժամանակ, վերահաստատեց իր այն կարծիքը, որ ժամանակավոր կառավարությանն իրենք ընդդիմադիր չեն լինելու։
Թեմայի շուրջ նախնական քննարկումներ եղել են «Ժողովրդավարական հայրենիք» կուսակցության հետ։ Այդ մասին «Առաջին լրատվական»-ի հետ զրույցում ասաց կուսակցության նախագահ Պետրոս Մակեյանը. «Հանդիպում եղել է, իրավիճակի շուրջ քննարկումներ ենք անցկացրել»։
Ինչ վերաբերում է մեկ միասնական ցուցակով ընտրություններին մասնակցելու հնարավորությանը, մեր զրուցակիցն ասաց. «Իմ կարծիքով՝ Նիկոլ Փաշինյանը և ՔՊ-ն չեն համաձայնի։ Նիկոլը հասկանում է, որ հետհեղափոխական էյֆորիան իրենն է։ Մենք գիտենք, որ Սերժ Սարգսյանի օրոք քաղաքական դաշտն ամբողջությամբ ոչնչացվել է, հիմա անհրաժեշտ է, որ այդ դաշտը ձևավորվի։ Այն բոլոր ուժերը, որոնք հեղափոխության համար պայքարել են, կարող են նման ցանկություն հայտնել, ամեն ինչ սկսվեց իրենցով, նյութականացվեց Նիկոլ Փաշինյանով։ Հիմա Նիկոլ Փաշինյանը իրենով է փորձում անել, մի կողմից դա լավ է, որովհետև քաղաքական դաշտի կայացման համար այլընտրանքային քաղաքական ուժեր պետք է ձևավորվեն, «Հիմնադիր խորհրդարանի», «Ժառանգության», մեր կուսակցության անելիքը բարդ է, բայց պետք է լուծումները գտնենք»։
Շարունակելով իր միտքը, մեր զրուցակիցը նշում է. «Ես հասկանում եմ Րաֆֆի Հովհաննիսյանին։ Նա ասում է, որ մենք էլ ենք մասնակցել հեղափոխությանը, ուրեմն պետք է ժողովրդավարական ուժերի հետ լինենք ցուցակում, կա տրամաբանություն, բայց ես նրան ասել եմ՝ Նիկոլ Փաշինյանը չի համաձայնի, մենք պետք է գնանք այլընտրանքի։ Փաշինյանի խնդիրը ոչ միայն քվեարկություն ապահովելն է, այլ ընտրելու հնարավորություն ստեղծելը»։
«Ազատ դեմոկրատներ» կուսակցության վարչության փոխնախագահ Անժելա Խաչատրյանը «Առաջին լրատվական»-ի հետ զրույցում նշեց, որ թեմայի շուրջ «Ժառանգության» հետ քննարկումներ առայժմ չեն եղել. «Մեր կուսակցությունը մշտապես ունեցել է այն կարծիքը, որ քաղաքական դաշտում պետք է համախմբվածություն լինի, մենք միշտ կողմնակից ենք եղել համախմբմանը։ Համարում ենք, որ հիմա էլ դա քննարկման ենթակա հարց է»։
Խաչատրյանի խոսքերով՝ «Ազատ դեմոկրատներ» կուսակցությունը, կողմ լինելով համախմբմանը, ընդունելի է համարում միայն գաղափարական համախմբումները։ «Մնացած համախմբումները պահի տակ խնդիր լուծելու համար արհեստական են լինում ու երկար կյանք չեն ունենում։ Եթե քաղաքական ուժերն իրենց առաջ խնդիր են դնում ընտրությունների մասնակցության, բնականաբար պետք է ունենան մոտեցումների՝ թե՛ արտաքին, թե՛ ներքին քաղաքականության սկզբունքների համընդհանրություն։ Հակառակ դեպքում՝ այդպիսի համախմբումները արհեստական են։ Մենք չգիտենք՝ հիմա ինչպիսի համախմբման մասին է խոսքը, բայց գաղափարը ողջունում են, իսկ առաջիկայում կլսենք ու կքննարկենք այդ հարցը»,- եզրափակեց Անժելա Խաչատրյանը։
