Բիզնեսն ու քաղաքականությունը պետք է տարանջատել։ Նման հայտարարությունները հնչում են տարբեր մակարդակներով՝ ընդհուպ մինչև վարչապետի։ Առաջիկա խորհրդարանական ընտրություններում «Բարգավաճ Հայաստան» կուսակցության նախագահ, օլիգարխ Գագիկ Ծառուկյանը գլխավորելու է կուսակցության համամասնական ցուցակը, համենայնդեպս՝ նման ցանկություն ունեն կուսակցականները։
«Առաջին լրատվական»-ի հետ զրույցում ԱԺ ԲՀԿ խմբակցության պատգամավոր Նաիրա Զոհրաբյանը նշեց, որ Ծառուկյանի դեպքում բիզնեսի և քաղաքականության տարանջատում չկա, քանի որ Ծառուկյանը անձամբ բիզնես գործունեությամբ չի զբաղվում։
Հարցին՝ հնարավո՞ր է Ծառուկյանն անձամբ չմասնակցի ընտրություններին՝ հաշվի առնելով վարչապետ Նիկոլ Փաշինյանի՝ բիզնեսը քաղաքականությունից տարանջատելու մասին հայտարարությունը, ինչպես նաև Ծառուկյանի անվան շուրջ վերջին օրերին ստեղծված իրավիճակը և միջադեպը, Զոհրաբյանն ասաց՝ յուրաքանչյուր քաղաքական ուժ ինքն է որոշում կայացնում։
«Ես կարծում եմ՝ դա մեր որոշելիքն է, մեր կուսակցության որոշելիքն է։ Ես չեմ կարծում, որ այստեղ որևէ մեկը, ինչքան էլ ազդեցիկ լինի, կարող է թելադրել՝ որ քաղաքական գործիչը կամ ուժը մասնակցի կամ չմասնակցի ընտրություններին»,- շեշտեց ԲՀԿ խմբակցության պատգամավորը։
Զոհրաբյանի խոսքով՝ մենք այլևս ապրում ենք այնպիսի Հայաստանում, որտեղ «դիկտատորներ» չպետք է լինեն. «Գագիկ Ծառուկյանը, իմ վստահ համոզմամբ, միանշանակ պետք է գլխավորի առաջիկա խորհրդարանական ընտրություններում «Բարգավաճ Հայաստան» կուսակցության համամասնական ցուցակը»։
Ծառուկյանի անվան հետ կապված վերջին աղմկոտ միջադեպի մասով Զոհրաբյանն ասաց՝ հարցը գտնվում է իրավապահների տիրույթում և որևէ ազդեցություն չունի Ծառուկյանի վրա։ «Ի՞նչ ազդեցություն պետք է ունենա։ Մենք խնդիրը որևէ կերպ չենք քաղաքականացնում, որևէ քաղաքական ենթատեքստ չենք ուզում տեսնել։ Մենք կարծում ենք, որ իրավական առումով այստեղ խնդիրներ կան, և ակնկալում ենք, որ իրավական հարթությունում դրանց լուծում կտրվի։ Ես չեմ կարծում, որ իրավական և քաղաքական հարթությունները պետք է իրար զուգակցել»,- կարծիք հայտնեց պատգամավորը։
Մեր հստակեցմանը՝ Գագիկ Ծառուկյանը հստակ որոշում ունի՞ ընտրություններին անձամբ մասնակցելու, Նաիրա Զոհրաբյանը նշեց՝ նման հարց չեն քննարկել. «Մեզ համար նման հարց, որ Ծառուկյանը չմասնակցի ընտրություններին, գոյություն չունի, իսկ գոյություն չունեցող հարցեր մենք չենք քննարկում»։
Լուսանկարը՝ Photolure-ի
