Այս շաբաթն էլ մեկնարկեց շոկային նորություններով, ըստ էության, թելադրելով մեր աշխատանքային օրակարգը։ Ուստի հարկ է նկատել․ Հայաստանում տեղի ունեցող ձերբակալությունները, կալանավորումները, բերման ենթարկելու գործընթացները, բացի այն նպատակներից, որի մասին խոսվում է ամենից շատ՝ կոռուպցիայի դեմ պայքար, օրինականության հաստատում, ի վերջո, յուրացված հանրային և պետական ունեցվածքի վերադարձ, ունեն նաև մեկ այլ կարևոր նպատակ: Խոսքը «կուռքերի» կամ «միֆերի» անկման մասին է: Աղմկոտ ձերբակալություններն ու բացահայտումներն, ըստ էության, շրջափակման մեջ են առել քրեաօլիգարխիայի առաջին դեմքերին. Մարտի 1-ի գործը դուրս է եկել Ռոբերտ Քոչարյանի հետքի վրա, իսկ Սերժ Սարգսյանի գրեթե բոլոր մերձավորները մեղադրվում են ապօրինի հարստացման կամ այլ հանցագործությունների կատարման մեջ:
Այս համատեքստում խիստ ուշագրավ է ՀՀԿ-ի լռությունը. եթե հաշվի չառնենք Դավիթ Հարությունյանի ու Վահրամ Բաղդասարյանի ռեպլիկները, Սերժ Սարգսյանի կուսակցությունը գրեթե չի արձագանքում տեղի ունեցածին և արտաքուստ անխռով կեցվածքով զբաղված է ԸՕ բարեփոխումներին վերաբերող քննարկումներով: Մինչդեռ, իրականում տեղի է ունենում հին համակարգի խորհրդանիշներից կամ «կուռքերից» ազատվելու դեռ երեկ անհավանական թվացող գործընթաց, որի հոգեբանական ահռելի նշանակությունը ճիշտ կլինի գնահատել այսօր:
Թեմայի շուրջ «Առաջին լրատվական»- ի հետ քննարկմանը մասնակցեցին իրավապաշտպան Ժաննա Ալեքսանյանը, Երևանի ավագանու «Ելք» խմբակցության անդամ Անահիտ Բախշյանը և վերլուծաբան Արմեն Բաղդասարյանը:
Անդրադառնալով դիտարկմանը, որ այսօր Տարոն Մարգարյանը հրաժարական է տվել Երևանի ավագանու պաշտոնից, Ա. Բախշյանը նշեց. «Տարոն Մարգարյանի հրաժարականը անխուսափելի էր այս մթնոլորտում, այս բացահայտումների հետևանքով, երբ ցուցադրվեց այն ամենը, ինչ նա ունի, թեև նշվեց, որ նրա ունեցվածքը հայտարարագրված է, բայց ընդհանուր մթնոլորտը այնպիսին է, որ ամոթի մթնոլորտը սկսել է աշխատել Հայաստանում»:
«Մեկ միլիոնանոց քաղաքի բնակիչներն իրենց աչքի առաջ կոռուպցիան ամեն օր տեսել են, տեսել են, թե ինչպես են ասֆալտը քերել, նորից ասֆալտել… Ես վստահ եմ, սա միայն սկիզբն է կոռուպցիոն սխեմաների բացահայտման: Այսինքն՝ տեղի է ունեցել այն, որ այդ մարդը հասկացել է,որ այլևս ոչ միայն ի վիճակի չէ աշխատել, այլև անիմաստ է դիմադրելը, և պարզապես հեռացել է, քանի դեռ ԱԱԾ-ն կամ ոստիկանությունն իր թևերը չեն ոլորել ու տարել. ուղղակի նա խուսափել է խայտառակությունից»,- ընդգծեց Ա. Բաղդասարյանը:
Ժ. Ալեքսանյանի խոսքով՝ Տարոն Մարգարյանը կոռումպացված պաշտոնյայի ցայտուն կերպար է, և այս բացահայտումների շրջանում ավելի արտահայտված է նրա կերպարը. «Միջավայրն այնպես է փոխվել,որ նա չէր կարող գտնել մեկին, որի հետ կաշխատեր այնպես, ինչպես նախկինում, և պետք է հրաժարական տար»:
Մանրամասն՝ տեսանյութում:
