ՀՀ պաշտպանության նախարարությունը ԵԿՄ-ին տրամադրվող հատկացումների հետ կապված որոշումներ կկայացնի միայն ԵԿՄ նախկին նախագահ Մանվել Գրիգորյանի դեմ հարուցված քրեական գործի ավարտից հետո: Այս մասին լրագրողների հետ զրույցում ասաց ՀՀ պաշտպանության նախարար Դավիթ Տոնոյանը:
«Համոզված եմ, որ հարուցված քրեական գործի ավարտին կունենանք այնպիսի պատկեր, որը թույլ կտա որոշումներ կայացնել ՊՆ-ում հատկացումների հետ կապված: Սպասում ենք քրեական գործի ավարտին»,-ասաց Տոնոյանը:
Նրա խոսքով՝ եթե ԵԿՄ-ն կարողանա վերափոխվել և էլ ավելի մասնագիտացված աջակցել ՊՆ-ին և բանակ-հասարակություն կապի ամրապնդմանը, նախազորակոչային պատրաստության կազմակերպմանը, ապա իրենք աջակցելու են այդ կառույցին: Նախարարը նաև նշեց, որ ԵԿՄ-ն բավականին մեծ չափաբաժին է ունեցել բանակ-հասարակություն կապի ամրապնդման գործում:
ԵԿՄ նախկին նախագահ Մանվել Գրիգորյանը կալանավորված է. նրան մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:
