Քաղաքական ուժերի այն դասավորությունը, որն առկա է, արդյո՞ք հնարավորություն է տալիս արդար մրցակցային քաղաքական պայքար ծավալել: Անդրադառնալով այս հարցին՝ «Առաջին լրատվական»- ի հետ զրույցում քաղաքագետ Անուշ Սեդրակյանը նշեց. «Հիմա է եկել արդար մրցակցային պայքարի ժամանակը, որտեղ ցավոք դեռ չեն բախվելու գաղափարական տեսլականները այն պարզ պատճառով, որ գաղափարական տեսլականներ չկան»:
Սեդրակյանի դիտարկմամբ՝ Հայաստանում այժմ պայքարը «լավ» և «վատ» տղերքի միջև է. «Այս ընտրություններում կանգնելու են «լավ տղերքը», որ արել են շատ լավ բաներ, և «վատ տղերքը», որ արել են շատ վատ բաներ. այդ սահմանազատումն է աշխատելու: «Լավ տղերք» ասելով՝ նկատի ունեմ Փաշինյանին և իր թիմը, «վատ տղերք» ասելով՝ հանրապետականներին: «Վատ տղաներ» հասկացության տակ պետք է ներառենք նաև բոլոր այն կուսակցություններին, որոնք մասնակցել են Հայաստանի կրիմինալ կոռուպցիոն բուրգի ստեղծմանը:
Այն քաղաքական ուժերը, ովքեր Հայաստանում մասնակցել են հանցավոր իշխանության գործունեությանը, որը բերել է ապօրինի հարստացմանը կոռուպցիայի և կրիմինալիզացիայի թեժացմանը, իրավունք ունեն մասնակցելու քաղաքական պայքարին, բայց պետք է արժանի որակում ստանան: Նախ պետք է մաքրագործում: «Վատ տղերքը»՝ ՀՀԿ-ն ընտրական պայքարում ինչքան էլ իրեն ընդդիմություն հայտարարի, չի ստացվելու»:
Քաղաքագետն անդրադառնալով վերջին շրջանի աղմկահարույց բացահայտումներին, նշեց, որ Նիկոլ Փաշինյանն իրականացրեց հեղափոխությունը, բայց կուռքը ԱԱԾ-ն է: Նրա խոսքով՝ քաղաքական կամքի կրողը Փաշինյանն է, բայց օրվա հերոս է դառնում ԱԱԾ-ն:
Անուշ Սեդրակայնը նաև նշեց, որ Ռուսաստանին հետաքրքրում է միայն Հայաստանի լոյալությունը: Անդրադառնալով ռուսահայ քրեաօլիգարխիային և դիտարկմանը, որ Կարեն Կարապետյանը հրաժարվել է կուսակցության փոխնախագահի պաշտոնից՝ մնալով ՀՀԿ անդամ, Սեդրակյանը նշեց. «Ռուսահայ քրեաօլիգարխիան մեկ անգամ պարտվել է Սերժ Սարգսյանին՝ առանց հանրային աջակցության, երկրորդ անգամ՝ արդեն հանրային աջակցությամբ կպարտվի Նիկոլ Փաշինյանին: Ընտրակաշառքը պետք է բացառվի…»: Քաղաքագետի դիտարկմամբ՝ ընտրապայքարի մասնակիցների համար շատ դժվար է լինելու ապացուցել, որ իրենք Նիկոլ Փաշինյանից լավ տղա են:
Մանրամասն՝ տեսանյութում:
