Իրավապահների ընդամենը մի քանի օրվա ինտենսիվ աշխատանքի և նախկին համակարգի բարձրաստիճան պաշտոնյաների կամ նրանց հետ առնչություն ունեցող անձանց ունեցվածքի և սեփականության մի քանի փոքր խուզարկությունները պարզեցին, թե Հայաստանում ինչ ծավալի գողություններ են կատարվել և ինչպիսին են կլեպտոկրատիայի մասշտաբները: Շղթան բավականին արատավոր է և ընդգրկուն:
Թավշյա հեղափոխության հաղթանակից հետո վստահության տոտալ ճգնաժամ է առաջացել տեղական իշխանիկների հանդեպ: Մարդիկ ցանկանում են օր առաջ ազատվել այն համայնքապետներից, որոնք տարիներ շարունակ թալանել և նվաստացրել են մարդկանց:
Թեմայի շուրջ «Առաջին լրատվական»- ի հետ քննարկմանը մասնակցեցին Երևանի ավագանու «Ելք» խմբակցության անդամ Անահիտ Բախշյանը, փաստաբան Հովիկ Արսենյանը և հրապարակախոս Արա Նեդոլյանը:
Նեդոլյանի խոսքով՝ միայն ուրախությունն այն բանի համար, որ ճակատագրի անիվը փոխվում է, և հարուստները կործանվում են, երկարաժամկետ էֆեկտ չի տա: Նրա կարծիքով՝ որպեսզի իսկապես բացվի ամբողջ կծիկը և լինի իսկապես սոցիալական փոփոխություն, պետք է ռեֆորմների միջոցով կազմվեն շահառուների զանգվածային խմբեր:
Անահիտ Բախշյանի դիտարկմամբ՝ ռեսուրսը չի բավարարի, եթե բոլոր օդիոզ, մաֆիոզ դեմքերի տները գնան խուզարկելու. «Իսկ ինչպե՞ս բոլորին կարգի հրավիրեն: Կարծում եմ պահն է, որ ով թաքուն բան ունի գողացած ու դոշակի տակ պահած, պետք է ինքնախոստովանության և ապաշխարհելու ձև գտնի: Հայաստանում արդեն սկսել է գործել ամոթի ինստիտուտը… Մանվել Գրիգորյանն ու իր ընտանիքը ամոթով են նայելու այս հասարակության աչքերին: Ամոթի զգացումը դարձել է բարոյական նորմ»:
Արսենյանի խոսքով՝ պետք է առաջնորդվենք մեր օրենսդրությամբ և պահպանենք օրինականությունը: «Եթե հաղորդումներ լինեն հանցագործության մասին, համոզված եմ, մեր պետության իրավապահ համակարգը ի զորու է այդ բոլոր գործողությունները կատարելու: Իրավապահ համակարգում կարող ուժեր կան այդ բոլոր գործողությունները կատարելու համար»,- նշեց փաստաբանը:
Նա նաև ընդգծեց, որ այժմ Ժողովուրդը, պետությունը և իրավապահ համակարգը լծված են մի նպատակի՝ կայունացնել մեր պետությունը, ապահովել քաղաքացիների իրավունքներն ու ազատությունները:
Մանրամասն՝ տեսանյութում:
