Ազգային ժողովի արտահերթ նիստի ժամանակ՝ դեկտեմբերի 12-ին, ՀՀ կրթության և գիտության նախարար Արմեն Աշոտյանից լրագրողները փորձեցին ճշտել՝ արդյոք կառավարությունը, որ խոստացածի պես չի ապահովել 7 տոկոս տնտեսական աճը, հրաժարակա՞ն է տալու: «Գիտե՞ք ինչն է ինձ ավելի շատ հետաքրքրում նման հարցադրումների մեջ. այդ հարցադրումներն անողները՝ ոչ իշխանական քաղաքական ուժերը, որպես կանոն, քննադատում են բացառապես կառավարությանը և փորձում են կառավարությունը դիտարկել իշխանական համակարգից առանձին»,- ասաց նա: Աշոտյանի խոսքով՝ հնարավոր է՝ այդպես ավելի հեշտ է քաղաքական գործունեություն վարել, գուցե կառավարությանը քննադատելու, հրաժարական պահանջելու համար մեծ խիզախություն այսօր պետք չէ, կամ գուցե այդպես ավելի հարմար է: Ամենակարևորը, ըստ նախարարի, այն է, որ եթե անգամ, տեսականորեն, այս կառավարությունը հրաժարական տա, մեկ է՝ հաջորդ կառավարությունը կազմավորելու է նույն քաղաքական թիմը:
Ըստ Աշոտյանի՝ քաղաքական թիմը շատ լավ գիտի՝ նախարարական պաշտոններ զբաղեցնելու համար իր ներսում այսօր կադրային լավ ռեսուրս ունի՞: Լրագրողները հետաքրքրվեցին՝ արդյոք կադրերի մեջ չի՞ գտնվի մեկը, որը 7 տոկոս տնտեսական աճ կապահովի, նախարարը նշեց, որ նախագահի՝ կառավարության նիստում հնչած հորդորը՝ գրանցել յոթտոկոսանոց տնտեսական աճ, քաղաքական հորդոր է եղել:
«Եթե ուշադիր նայեք ծրագիրը, կտեսնեք, որ նվազագույն շեմը, որ դրված է կառավարության կողմից՝ որպես տնտեսական աճ, 5 տոկոս է: Հետևաբար, մենք դնում ենք ցանկություններ, գաղափարներ, դրանց հասնելու համար գործադրում ենք ջանքեր, և եթե ցուցանիշները չենք հասցնում, դուք հանգիստ եղեք, երկրի նախագահի փոխարեն մի՛ մտահոգվեք, որովհետև վստահ եմ, որ դուք էլ եք վստահում իր քաղաքական գործունեությանը»,- ասաց նա՝ նշելով, որ երբ նախագահը հարկ համարի նման տեսակի խնդիրներ բարձրաձայնել, ապա կուսակցությունը կլինի այն տեղը, որտեղ այդ խնդիրները կբարձրաձայնվեն: Իսկ նման գործընթաց դեռևս չկա:
«Վայելե՛ք հայրենի կառավարության աշխատանքները»,- առաջարկեց ԿԳ նախարարը:
