Նախօրեին Կառավարության արտահերթ նիստում Նիկոլ Փաշինյանի և Արծվիկ Մինասյանի բանավեճը կամ պարզապես բախումն իրապես արտացոլում է այն իրավիճակը, որն անխուսափելիորեն առաջանալու է ավելի լայն մակարդակում: Արմեն Ռուսատմյանն, օրինակ, արդեն հայտարարել է, որ չեն տեսնում քայլեր գերվարչապետության նվազեցման ուղղությամբ, ինչպես նաև խոսել է պարտադրվող որոշումների մասին: Վերլուծաբանները կարծում են, որ նախընտրական այս դրսևորումները տրամաբանական տարբեր մոտիվացիաներով լինելու են պարբերաբար:
Թեմայի շուրջ «Առաջին լրատվական»- ի հետ ծավալված քննարկմանը մասնակցեցին «Ազատ դեմոկրատներ» կուսակցության փոխնախագահ Անժելա Խաչատրյանը, «Հիմնադիր խորհրդարանի» անդամ Կարո Եղնուկյանը, ՀՔԱ Վանաձորի գրասենյակի ղեկավար Արթուր Սաքունցը:
Անդրադառնալով այն փաստին, որ Մանե Թանդիլյանն այսօր հրաժարական է տվել Աշխատանքի և սոցիալական հարցերի նախարարի պաշտոնից, Անժելա Խաչատրյանը նշեց. «Մեր քաղաքական գործիչները մոռանում են, թե երկու տարի կամ երկու ամիս առաջ ինչ են ասել, այս դեպքում կարևոր է, որ մարդը իր ասածներին տեր է կանգնում և անգամ հրաժարվում է նախարարի պաշտոնից»:
Հիշեցնենք՝ նշանակվելով Աշխատանքի և սոցիալական հարցերի նախարար, Մանե Թանդիլյանն իր դիրքորոշումը հայտնել էր պարտադիր բաղադրիչի ամբողջական ներդնումը 1 տարով հետաձգելու և հանրային քննարկումների միջոցով համակարգը փոփոխելու տեսքով:
Արթուր Սաքունցի դիտարկմամբ՝ կառավարման ոճը և վիճակը փոխվել է. «Այսօր ունենք բազմակուսակցության տարրը, ինչը նախկինում մեռած էր: ՀՅԴ-ն Նախորդ կառավարության կազմում էր, բայց ՀՅԴ ներկայացուցչի մտքով անգամ չէր անցնի այլ կարծիք հայտնել կառավարության ղեկավարին կամ նախագահին: Բացի դրանից՝ քաղաքական դաշտը Հայաստանում մեռած էր… Կարևոր է, որ դիրքորոշում է արտահայտում կոալիցիայի ներկայացուցիչ, նա քաղաքական որոշում է կայացնում և քաղաքական պատասխանատվություն է վերցնում, հրաժարական է տալիս ոչ միայն նախարարի պաշտոնից, այլ նաև դուրս է գալիս կուսակցությունից… Մանե Թանդիլյանը ազնիվ գտնվեց և ԼՀԿ-ին անհարմար դրության մեջ չդրեց՝ հեռանալով կուսակցությունից»:
Կարո Եղնուկյանի դիտարկմամբ՝ այսօրվա հայաստանյան իշխանությունն ունի ոչ նորմալ կառուցվածք: Նրա խոսքով՝ թիմը չի կազմվել բանակցությունների, փոխհամաձայնությունների արդյունքում, դրա համար ստեղծվել է ոչ նորմալ իրավիճակ, կառավարության անդամները պետք է ենթարկվեն Փաշինյանին, բայց իրենք էլ իրենց դիրքորոշումն ունեն, և ճգնաժամը խորանալու է:
«Մանե Թանդիլյանի հրաժարականը պատասխանատու քաղաքական գործչի քայլ է,- ընդգծեց Սաքունցը: Ա. Խաչատրյանը հավելեց. «Մանե Թանդիլյանը մարտահրավեր նետեց կառավարության մյուս անդամներին»:
Մանրամասն՝ տեսանյութում: