«Ժողովուրդ» օրաթերթի գլխավոր խմբագիր Թագուհի Թովմասյանը թերթի այսօրվա խմբագրականում գրում է.
Գազի սակագնի նվազման, ապա 150-ից 300 միլիոն դոլարի հասած պարտքի մասին ՀՀ իշխանությունների հակասական հայտարարություններից հետո, թերևս, չարժե լուրջ ընդունել նրանց կողմից ներկայացվող որևէ տնտեսագիտական հաշվարկ կամ վերլուծություն:
Սակայն, ինչպես ասում են, ունենք այն, ինչ ունենք: Հետևաբար, որքան էլ անհեթեթ թվան նրանց մտքերը, ստիպված ենք դրանք ներկայացնել: Մասնավորապես, կապված իրանական գազի հետ՝ ՀՀ էներգետիկայի և բնական պաշարների նախարար Արմեն Մովսիսյանը մեկ անգամ չէ, որ հայտարարել է, թե իրանական գազն ավելի թանկ է և պակաս կալորիական, քան ռուսականը: Հատուկ ընդգծենք, որ Մովսիսյանն այդ մասին խոսել է դեռ մինչև ՄՄ-ին անդամակցելու որոշումը` անցած հունիսի սկզբին, երբ ՀՀ-ում Իրանի դեսպան Մ. Ռեյիսին հայտարարել էր, թե Իրանը պատրաստ է Հայաստանին մատակարարել ռուսականից ավելի էժան գազ:
Օրերս, սակայն, դեսպան Ռեյիսին բացահայտեց Մովսիսյանի սուտը` հայտարարելով, թե գազի գնման շուրջ ՀՀ իշխանությունները երբևէ չեն բանակցել Իրանի հետ: Եվ ահա այս խայտառակ իրավիճակում, թվում էր, իշխանությունների համար լավագույն լուծումը լռելն էր:
Սակայն կարկառուն ՀՀԿ-ականները` ի դեմս ՀՀԿ խմբակցության ղեկավար Գալուստ Սահակյանի, անդրդվելի են և պատրաստ են ջախջախել մինչ այդ հնչեցված անհեթեթությունների բոլոր ռեկորդները:
Խմբագրականն ամբողջությամբ՝ կարդացեք «Ժողովուրդ» օրաթերթի այսօրվա համարում:
