Միացյալ Նահանգների դեսպան Ռիչարդ Միլզը լրագրողների հետ զրույցում ասել է, որ ԱՄՆ կառավարությունը դիտարկում է Հայաստանին օգնության ծրագրեր, մասնավորապես «Հազարամյակի մարտահրավերներ» ծրագրի վերականգնման հարցը: Ըստ դեսպան Միլզի՝ հարցը եղել է օրերս Երևան ժամանած ԱՄՆ պետքարտուղարի Եվրասիայի հարցերով փոխտեղակալի օրակարգում:
Քաղաքագետ Գևորգ Մելիքյանի կարծիքով՝ եթե Միացյալ Նահանգները փակել է այդ ծրագիրը 2008-ի մարտիմեկյան իրադարձությունների պատճառով, ապա պետք է հասկանալ՝ արդյոք վերացե՞լ են դրա հետևանքները, ու այլևս խոչընդոտ չկա՞. «Հասկանալի է, որ բավականին երկար՝ 10 տարի ժամանակ է անցել, և մոտեցումները փոխվել են հատկապես թավշա հեղափոխությունից հետո, բայց Միացյալ Նահանգները կարող է գնալ որոշակի փոխզիջման։ Գուցե Մարտի մեկի հետ կապված հետաքննության արդյունքները բավարար չեն, բայց տեղի ունեցող գործընթացները կարող են հիմք հանդիսանալ այդ ծրագրի շուրջ նոր բանակցություններ սկսելու համար»,- «Առաջին լրատվական»-ի հետ զրույցում ասաց Մելիքյանը։
Մեր զրուցակիցը շարունակում է. «Հայաստանը պետք է կատարի տնային աշխատանքը՝ փոխի եղած խնդիրները, կարողանա որոշակի լուծումներ ու ճանապարհներ ցույց տալ, որի արդյունքում շատ ծրագրեր, նաև՝ ԵՄ-ի հետ, կիրագործվեն»։
Գևորգ Մելիքյանը ընդգծում է. «Գալիս է մի պահ, երբ հասունանում ես, սկսում ես ինքդ քո խնդիրը լուծել։ Սա ամենակարևոր ազդակն է, երբ միջազգային հանրությունը տեսնում է, որ դու կանգնել ես ոտքի ու ասում ես, որ ինքդ կարող ես քո խնդիրները լուծել։ Հուսով եմ՝ ճիշտ ճանապարհի վրա ենք։ Մենք հնարավորություն ունենք դառնալու որակապես այլ երկիր՝ հնարավորություն ենք ստանում խնդրողի կարգավիճակից դուրս գալու ու մեջքն ուղղելու»։
Հարցազրույցն ամբողջությամբ՝ տեսանյութում:
