Հյուսիսային Կորեայի իշխանությունները հաստատել են ավելի վաղ ԶԼՄ-ներում հայտնված տեղեկությունը բոլոր բարձր պաշտոններից երկրի առաջնորդ Կիմ Չեն Ինի ազգականի՝ Չան Սոն Թհեկի հեռացման մասին: Որպես պաշտոնական պատճառ նշվում են «քրեական հանցագործությունները»: Այս մասին հայտնում է Հյուսիսային Կորեայի կենտրոնական հեռագրային գործակալությունը՝ փոխանցում է RIA Novosti-ն:
Ավելի վաղ հարավկորեական «Ռենհապ» գործակալությունը՝ հղում անելով հետախուզական տվյալներին, հայտնել էր, որ Հյուսիսային Կորեայի հանգուցյալ առաջնորդ Կիմ Չեն Իրի քրոջ ամուսին Չան Սոն Թհեկը պաշտոնանկ է արվել պաշտպանության պետական կոմիտեի փոխնախագահի պաշտոնից, որը համարվում է երկրի առանցքային պաշտոններից մեկը, ինչպես նաև այլ բարձր պետական պաշտոններից: Որոշ տվյալներով՝ նրա մի քանի օգնականներ մահապատժի են ենթարկվել կոռուպցիայի մեղադրանքով:
Հյուսիսային Կորեայի կենտրոնական հեռագրային գործակալության տարածած հաղորդագրության համաձայն՝ Չանն ու նրա կողմնակիցները քրեական հանցագործություններ են կատարել, որոնք զարմանք են առաջացնում, և վիթխարի վնաս հասցրել կուսակցությանն ու հեղափոխությանը: Հաղորդվում է, որ պարտականությունների կատարումից նրա հեռացման մասին որոշումն ընդունվել է կիրակի՝ Աշխատանքային կուսակցության քաղբյուրոյի նիստի ժամանակ:
Նշենք, որ իշխանության ղեկին գտնվելու երկու տարիների ընթացքում Կիմ Չեն Ինը փոխել է զինվորական ղեկավարության ներկայացուցիչների շուրջ կեսին:
