Կրթության փորձագետ Սերոբ Խաչատրյանը կարծիք հայտնեց, որ ցանկացած պաշտոնյա, որն ընտրվել կամ նշանակվել է նախորդ իշխանությունների ժամանակ, ճիշտ կլիներ ներկայացներ հրաժարական, որովհետև դա նաև ինչ-որ իմաստով հեղափոխության արդյունք է: «Եթե նոր իշխանությունները հարկ կհամարեն, որ շարունակվի տվյալ պաշտոնյայի պաշտոնավարումը, միգուցե այդ դեպքում հարցը քննարկվեր: Պետք է հասկանալ, որ պաշտոն գրավելը չպետք է լինի ինքնանպատակ, և առանց պաշտոնի էլ կյանքը հետաքրքիր է,- նշեց Սերոբ Խաչատրյանը: -Բայց մյուս կողմից՝ եթե հրաժարական չի ներկայացվել, չեմ կարծում, որ այն, ինչ երեկ տեղի ունեցավ ԵՊՀ-ում, պայքարի ճիշտ ձև է: Ողջամիտ տարբերակն այն է, որ եթե կա վարկած, որ չարաշահումներ են տեղի ունեցել, ապա պետք է ստուգումներ անցկացնել, որի արդյունքում կա՛մ կհաստատվի, կա՛մ կժխտվի այդ վարկածը: Եթե հաստատվի, համապատասխան քայլեր պետք է անել, եթե ոչ, ուրեմն պաշտոնյան կարող է շարունակել իր գործունեությունը»:
Կրթության փորձագետի դիտարկմամբ՝ ԵՊՀ-ում քաղաքականացման մեխանիզմը տարբերվում է դպրոցներում և մյուս բուհերում իրականացված քաղաքականացումից: Նրա հավաստմամբ՝ ԵՊՀ դասախոսների և ուսանողների մեծ մասը անկուսակցական է: «Այստեղ ուրիշ մեխանիզմ է գործել. այն, որ ԵՊՀ հոգաբարձուների նախագահը երկրի նախագահն էր և ՀՀԿ ղեկավարը, կաշկանդել է բուհի ղեկավարությանը և որոշակի ծուղակի մեջ է պահել: Այնուամենայնիվ, ԵՊՀ-ն, մյուս բուհերի համեմատ, ավելի ըմբոստ է եղել»:
Փաստաբան Սեդա Սաֆարյանի խոսքով՝ իրավական տեսանկյունից ԵՊՀ ռեկտորն ընտրված պաշտոնյա է և իրավունք ունի շարունակել պաշտոնավարումը: «Հանրային ճնշման արդյունքում համակարգային փոփոխություններ չեն լինելու, իսկ եթե իրականում կան չարաշահումներ և դրանց վերաբերյալ կան փաստեր, պետք է հարուցվի քրեական գործ և իրականացվի քրեական հետապնդում»,- նշեց փաստաբանը:
Ս. Խաչատրյանը հավելեց, որ հիմա կոռուպցիայի ավելի վտանգավոր թաքուն տեսակ կա բուհում, երբ դասախոսի և ուսանողի միջև լուռ համաձայնություն է կայացվում. «Մենք կնշանակենք ձեր դրական գնահատականը, դուք էլ մի՛ բողոքեք կրթության որակից»:
Երևանի ավագանու «Ելք» խմբակցության անդամ Դավիթ Խաժակյանը, խոսելով քաղաքապետարանում տիրող իրավիճակից, նշեց, որ թավշյա հեղափոխությունից հետո մի շարք բացահայտումներ են եղել. «Չարաշահումների պատճառով հեռացվեցին երեք դպրոցի և երկու պոլիկլինիկաների տնօրեններ, բացահայտվեցին նաև «Յունիգրաֆիկ» ՍՊԸ-ի կողմից չարաշահումները… Այս բացահայտումները բխում են քաղաքական իրողություններից: Նախկինում մարդիկ վախենում էին և չէին ցանկանում խոսել, որովհետև մտածում էին, որ դրանից բան չի փոխվի, իսկ այժմ ավելի անկաշկանդ են»:
Քննարկման մասնակիցները նաև նշեցին, որ կողմ են արտահերթ ընտրությունների կայացմանը: Սերոբ Խաչատրյանի խոսքով՝ Ճիշտ կլինի, որ ՀՀԿ-ն հրաժարական տա. «Հրաժարականը հեռանալու պատվաբեր ճանապարհ է»:
Մանրամասն՝ տեսանյութում:
